பிரிட்டனில் பிரமாண்ட வேலை நிறுத்தம்

by *சம்ஸ் Thu 1 Dec 2011 - 6:31

பிரிட்டனில் பிரமாண்ட வேலை நிறுத்தம்
20 லட்சத்துக்கு மேற்பட்ட பொதுத்துறை ஊழியர்கள் பங்கேற்பு: நாடே ஸ்தம்பிதம்
பிரிட்டன் அரசு மேற்கொண்டுள்ள பல்வேறு பொருளாதார சீர்திருத்தங்களை எதிர்த்து சுமார் 20 இலட்சம் பொதுத்துறை ஊழியர்கள் நேற்று பிரமாண்ட பொது வேலை நிறுத்தத்தில் ஈடுபட்டனர். இதனால் பிரிட்டனின் அன்றாட நடவடிக்கைகள் அனைத்தும் ஸ்தம்பிதம் அடைந்தன.

பிரிட்டனின் 30 தொழிற்சங்கங்கள் ஒன்றிணைந்த நடத்திய இந்த வேலை நிறுத்தத்தில் பாடசாலை, கல்லூரி, சாலை, ரயில், விமான சேவை, மருத்துவத்துறை ஊழியர்கள் பங்கேற்றனர். இதனால் பிரிட்டனின் விமான நிலையங்களின் சேவைகள் ஸ்தம்பிதமடைந்தன.

இதில் லண்டன் ஹீத்ரூ விமான நிலையத்தில் எல்லை பாதுகாப்பு ஊழியர்கள் வேலை நிறுத்தத்தில் ஈடுபடுவதால் வழமையான சேவைகளில் தாமதம் ஏற்பட்டது.

இந்த விமான நிலையத்தில் நாளொன்றுக்கு சுமார் 60 ஆயிரம் கடவுச் சீட்டுக்கள் சோதனை செய்யப்பெறுகின்றமை குறிப்பிடத்தக்கது.

அதேபோன்று கடந்த ஒரு நூற்றாண்டில் முதல் முறையாக பிரிட்டன் ஆசிரியர்கள் நேற்றைய தினம் வேலை நிறுத்தத்தில் ஈடுபட்டனர். இதனால் பிரிட்டனின் 80 வீதமான பாடசாலைகள் மூடப்பட்டன.

சுகாதாரத் துறையில் தாதிகள் மருத்துவமனை உதவியாளர்கள் என 4 இலட்சம் பேர் அளவில் பங்கேற்றதாக செய்தி வெளியாகியுள்ளது.

இந்த வேலை நிறுத்த ஆர்ப்பாட்டத்தில் ஸ்கொட்லாந்தில் மூன்று லட்சம் பொது ஊழியர்கள் பங்கேற்றதோடு வேல்ஸில் 170,000 ஊழியர்கள் பங்கேற் றதாக தொழிற் சங்கங்கள் குறிப்பிட் டுள்ளன. இதேபோன்று இந்த ஆர்ப்பாட்டத்தால் வட அயர்லாந்தில் பஸ், ரயில் சேவைகள் முழுமையாக ஸதம்பிதமடைந்ததோடு மூன்றில் இரண்டு பாடசாலைகள் மூடப்பட்டன.

பிரிட்டன் பிரதமர் டேவிட் கெமரூன் தலைமையிலான ஆளும் கூட்டணி அரசு அந்நாட்டின் பொருளாதாரத்தை மேம்படுத்தும் விதத்தில் ஓய்வூதியம் உள்ளிட்ட பல்வேறு வருவாய்களில் சீர்த்திருத்தங்களை மேற்கொ¡ண்டுள்ளது. அதன்படி, ஓய்வூதியத்திற்காக பொதுத் துறை ஊழியர்கள் அதிகளவில் தங்கள் பங்கைச் செலுத்த வேண்டும். கூடுதல் நேரம் உழைக்க வேண்டும். ஆனால் இதற்கு ஊழியர்கள் மத்தியில் கடும் எதிர்ப்புக் கிளம்பியது.

இதனையடுத்தே பொதுத்துறை ஊழியர்களினால் நேற்று ஒருநாள் வேலை நிறுத்தம் நடத்தப்பட்டது. 1926ல் நடந்த வேலை நிறுத்தத்தில் 30 லட்சம் ஊழியர்கள் கலந்து கொண்டனர். அதையடுத்து இந்த வேலை நிறுத்தம்தான் பிரிட்டினில் இடம்பெற்ற மிகப்பெரிய வேலை நிறுத்தமாக பதிவாகியுள்ளது.