எகிப்து முதல் கட்ட தேர்தலில் இஸ்லாமிய கட்சிகள் முன்னிலை

எகிப்து முதல் கட்ட தேர்தலில் இஸ்லாமிய கட்சிகள் முன்னிலை
முஸ்லிம் சகோதரத்துவ அமைப்புக்கு 40 வீத வாக்கு
எகிப்தில் இடம் பெற்ற முதல் கட்ட பாராளுமன்ற தேர்தலில் இஸ்லாமிய கட்சிகள் முன்னிலை பெற்றுள்ளன. மாறாக மதச்சார்பற்ற கட்சிகள் குறிப்பிடத்தக்க அளவில் வாக்குகளை பெறவில்லை என அந்நாட்டு ஊடகங்கள் செய்தி வெளியிட்டுள்ளன.

முன்னாள் ஜனாதிபதி ஹொஸ்னி முபாரக் மக்கள் கிளர்ச்சியின் மூலம் ஆட்சியில் இருந்து அகற்றப்பட்டதன் பின் எகிப்தில் முதல் முறையாக சுயாதீனமான தேர்தல் கடந்த வாரம் நடைபெற்றது. பாராளுமன்றத்தின் கீழ் சபைக்கான முதல் கட்ட தேர்தலாகவே இது நடைபெற்றது. 27 மாகாணங்களில் 9 மாகாணங்களுக்கு இத்தேர்தல் நடந்தது.

இதில் 70 சதவீதம் வரை வாக்கு பதிவாகி இருக்கலாம் என எதிர்பார்க்கப்பட்டது. எனினும் தேர்தல் ஆணையம் வெளியிட்ட அறிக்கையில், மொத்தம் 62 சதவீதம் வாக்குகள் பதிவாகியதாகவும் இது எகிப்தின் வரலாற்றில் மிக அதிகபட்சம் எனவும் தெரிவிக்கப்பட்டிருந்தது.

இந்நிலையில் தேர்தல் இறுதி முடிவுகள் தேர்தல் ஆணையத்தால் வெளியிடப்படவில்லை. பாராளுமன்ற கீழ் சபைக்கான இரண்டாவது மற்றும் மூன்றாவது கட்ட தேர்தல்கள் முறையே இம்மாத கடைசி மற்றும் அடுத்த மாதத்தில் நடைபெறவுள்ளன. இதனைத் தொடர்ந்தே இறுதி முடிவு வெளியிடப்படும்.

எனினும் கட்சிகள் பெற்ற ஆசன விபரத்தை வைத்து முதல் கட்ட தேர்தலின் முடிவை எகிப்து ஊடகங்கள் கணித்துள்ளன. இதன்படி இஸ்லாமிய கட்சிகளே முன்னிலை பெற்றுள்ளன. முஸ்லிம் சகோதரத்துவ அமைப்பின் அரசியல் கட்சியான சுதந்திரம் மற்றும் நீதிக் கட்சி 40 வீத வாக்குகளை பெற்றுள்ளது.

இதற்கு அடுத்ததாக கடும் போக்கு இஸ்லாமிய அமைப்பின் அந்நூர் கட்சி 25 வாக்குகளை பெற்று இரண்டாவது இடத்தை பிடித்துள்ளது. எகிப்தின் பிரதான முற்போக்கு கட்சிகளின் கூட்டணி 15 வீத வாக்குகளை பெற்றுள்ளது.

இதற்கமைய முதல் கட்ட தேர்தல் முடிவுகளின் படி முஸ்லிம் சகோதரத்துவ அமைப்பு 43 ஆசனங்களை வென்றுள்ளதோடு இரண்டு மாவட்டங்களை கைப்பற்றியுள்ளது. அந்நூர் கட்சி 22 ஆசனங்களை வென்றுள்ளதோடு முற்போக்கு கூட்டணி 7 ஆசனங்களை கைப்பற்றியுள்ளது. எனினும் 7 ஆசனங்களில் வெற்றி பெற்ற 4 பேர் தாம் சுயாதீனமாக இயங்குவதாக குறிப்பிட்டுள்ளனர்.

இதனிடையே முதல் கட்ட தேர்தலில் இஸ்லாமிய கட்சிகள் வெற்றி பெற்றிருந்தாலும் அனைத்து இஸ்லாமிய கட்சிகளையும் ஒரு கூடையில் வைத்து பார்க்க வேண்டாம் என முஸ்லிம் சகோதரத்துவ அமைப்பின் பேச்சாளர் மஹ்மூத் கொஸ்லாம் குறிப்பிட்டுள்ளார்.

“மக்கள் தமது இஸ்லாமிய அடையாளத்தை இத்தேர்தலில் வெளிக்காட்டியுள்ளனர். அதில் அவர்கள் உறுதியாக இருப்பது தெளிவாகிறது. மாற்று அமைப்புகள் ஊடாக மக்கள் மாற்றத்தை கொண்டுவர முற்படுகிறார்கள் என்று நாம் நினைக்கிறோம். ஆனால் அனைத்து இஸ்லாமிய வாதிகளையும் ஒரு கூடையில் வைத்து பார்க்க வேண்டாம்” என மஹ்மூத் கொஸ்லாம் குறிப்பிட்டுள்ளார்.

இதில் எகிப்தில் ஆளும் இராணுவ கவுன்ஸிலுக்கு எதிராக தேர்தல் வேளையில் மதச் சார்பற்றோரே ஆர்ப்பாட்டத்தில் ஈடுபட்டனர். அவர்கள் முதல் கட்ட தேர்தலை புறக்கணித்தால் மதச் சார்பற்ற கட்சிகள் பின்தள்ளப்பட்டிருக்கலாம் என விமர்சகர்கள் தெரிவித்துள்ளனர்.