இந்திய அணி கோப்பை வெல்லும் வாய்ப்பை அநியாயமாக பறிகொடுத்தது

சாம்பியன்ஸ் சாலஞ்ச் ஹாக்கி தொடரில், கோப்பை வெல்லும் வாய்ப்பை இந்திய அணி கடைசி நிமிடத்தில் கோட்டைவிட்டது. நேற்று நடந்த பரபரப்பான பைனலில் பெல்ஜியத்திடம் 3-4 என்ற கோல் கணக்கில் தோல்வி அடைந்தது. பெல்ஜியம் அணி சாம்பியன் பட்டத்தை தட்டிச் சென்றது.


தென் ஆப்ரிக்காவில் உள்ள ஜோகனஸ்பர்க் நகரில், சாம்பியன்ஸ் சாலஞ்ச் ஹாக்கி தொடர் நடந்தது. நேற்று நடந்த பைனலில் இந்தியா, பெல்ஜியம் அணிகள் மோதின. ஆட்டத்தின் 23வது நிமிடத்தில் "பெனால்டி கார்னர்' வாய்ப்பு மூலம் இந்தியாவின் ரகுநாத் முதல் கோல் அடித்தார். முதல் பாதி முடிவில் இந்தியா 1-0 என்ற முன்னிலையில் இருந்தது.

சமநிலை: இரண்டாவது பாதியில் இரு அணிகளும் மாறி மாறி கோல் அடிக்க, போட்டியில் அனல் பறந்தது. 40வது நிமிடத்தில் "பெனால்டி கார்னர்' மூலம் சந்தீப் சிங் ஒரு சூப்பர் கோல் அடித்தார். இது இத்தொடரில் இவரது 7வது கோல். இதற்கு 44வது நிமிடத்தில் பெல்ஜியத்தின் டிகெய்சர் பதிலடி கொடுத்தார். 54வது நிமிடத்தில் சிவேந்திர சிங் ஒரு "பீல்டு' கோல் அடிக்க, இந்தியா 3-1 என வலுவான முன்னிலை பெற்றது. இதையடுத்து இந்தியா வெற்றி பெறும் என எதிர்பார்த்தனர்.

தொடர் அதிர்ச்சி: ஆனால், பெல்ஜியம் வீரர்கள் அடுத்தடுத்து தாக்குதல் நடத்தி அதிர்ச்சி மேல் அதிர்ச்சி கொடுத்தனர். 55வது நிமிடத்தில் பொக்கார்டு ஒரு "பீல்டு' கோல் அடித்தார். 57வது நிமிடத்தில் டிகெய்சர் இன்னொரு கோல் அடிக்க, போட்டி 3-3 என சமநிலைக்கு வந்தது.

"திரில்' வெற்றி: ஆட்டத்தின் கடைசி 70வது நிமிடத்தில் பெல்ஜியம் வீரர் டாம் பூன் ஒரு கோல் அடித்து அணிக்கு "திரில்' வெற்றி தேடி தந்தார். பெல்ஜியம் அணி 4-3 என்ற கோல் கணக்கில் இந்தியாவை வீழ்த்தி, கோப்பையை தட்டிச் சென்றது. இதன் மூலம் வரும் 2012ல் நடக்க உள்ள சாம்பியன்ஸ் டிராபி தொடரில் விளையாட தகுதி பெற்றது. கடைசி நேர சொதப்பல் தொடர்ந்ததால், இந்திய அணி கோப்பை வெல்லும் வாய்ப்பை அநியாயமாக பறிகொடுத்தது.

3வது இடம்: முன்னதாக நடந்த 3-4வது இடத்துக்கான போட்டியில் தென் ஆப்ரிக்கா, அர்ஜென்டினா அணிகள் மோதின. இதில் அபாரமாக ஆடிய தென் ஆப்ரிக்க அணி, ஆட்டநேர முடிவில் 3-1 என்ற கோல் கணக்கில் வெற்றி பெற்று, மூன்றாவது இடத்தை கைப்பற்றியது. அர்ஜென்டினாவுக்கு நான்காவது இடம் கிடைத்தது.

மலேசியா வெற்றி: 5-6வது இடத்துக்கான போட்டியில் மலேசியா, போலந்து அணிகள் மோதின. இதில் அபாரமாக ஆடிய மலேசிய அணி, ஆட்டநேர முடிவில் 3-0 என்ற கோல் கணக்கில் வெற்றி பெற்று, ஐந்தாவது இடம் பிடித்தது. இதன்மூலம் போலந்து அணி 6வது இடம் பிடித்தது.

ஜப்பான் அபாரம்: நேற்று நடந்த 7-8வது இடத்துக்கான போட்டியில் ஜப்பான், கனடா அணிகள் மோதின. இதில் கோல் மழை பொழிந்த ஜப்பான் அணி 7-2 என்ற கோல் கணக்கில் வெற்றி பெற்று, ஏழாவது இடம் பிடித்தது. கனடா அணி, எட்டாவது இடம் பிடித்து ஏமாற்றம் அடைந்தது.