சொந்த பாதுகாப்பை பொறுப்பேற்று ஜனநாயகத்தை கட்டியெழுப்ப ஆப்கான் அரசுக்கு அமெ. அழைப்பு

சொந்த பாதுகாப்பை பொறுப்பேற்று ஜனநாயகத்தை கட்டியெழுப்ப ஆப்கான் அரசுக்கு அமெ. அழைப்பு
பாகிஸ்தான், தலிபான் இன்றி ஆப்கான் மாநாடு ஆரம்பம்
ஆப்கானிஸ்தானுக்குத் தொடர்ந்து உதவி வழங்குவதற்கு அமெரிக்கா தயாராகவுள்ளது. எனினும் மறுசீரமைப்பின் ஊடாக தனது சொந்தப் பாதுகாப்பைப் பொறுப்பெடுப்பதுடன் ஜனநாயகத்தைக் கட்டியெழுப்புவதன் ஊடாக சட்டத்தை நிலைநாட்டுவதற்கு ஆப்கானிஸ்தான் முன்வரவேண்டுமென அமெரிக்காவின் இராஜாங்கச் செயலாளர் ஹிலாரி கிளின்டன் தெரிவித்தார்.

ஜெர்மனியின் பொன் நகரில் நேற்று நடைபெற்ற ‘ஆப்பானிஸ்தானின் எதிர்காலம்’ தொடர்பான சர்வதேச மாநாட்டில் கலந்துகொண்டு உரையாற்றும்போதே அவர் இவ்வாறு கூறியிருந்தார்.

ஆப்கானிஸ்தானுக்கு அமெரிக்கா தொடர்ந்தும் உதவிகளை வழங்கி வருகிறது. ஆப்கானிஸ்தான் மறுசீரமைப்பின் மூலம் தனது சொந்தப் பாதுகாப்பு மற்றும் ஜனநாயகத்தை உறுதிப்படுத்த வேண்டும். பரஸ்பரமான வெளிப் பாட்டுத் தன்மையும் அவசியமாக உள்ளது என்றும் அவர் குறிப்பிட்டுள்ளார்.

இதனிடையே ஆப்கானிஸ்தானின் எதிர்காலம் குறித்து ஆலோசிக்கும் முக்கிய மாநாடு ஜெர்மனின் பொன் நகரில் நேற்று நடைபெற்றது. எனினும் இந்த மாநாட்டை பாகிஸ்தான் புறக்கணித் துள்ள§¡டு, ஆப்கானிஸ்தானின் முக்கிய அங்கமான தலிபான் அமைப்பும் மாநாடில் பங்கேற்கவில்லை.

இம்மாநாட்டில் ஆப்கான் ஜனாதிபதி ஹமீட் கர்சாயி, அமெரிக்க வெளியுறவுச் செயலாளர் ஹிலாரி கிளின்டன், ஈரான் வெளியுறவுச் செயலாளர் அலி அக்பர் சலாஹிக் உட்பட 100 க்கும் மேற்பட்ட நாடுகளின் 1000க்கும் அதிகமான பிரதிநிதிகள் பங்கேற்றனர்.

வரும் 2014 ஆம் ஆண்டு ஆப்கானில் இருந்து வெளிநாட்டு துருப்புகள் முழுமையாக வெளியேறவுள்ள நிலையில் ஆப்கானிஸ்தானின் எதிர்காலம் குறித்து இந்த மாநாட்டில் முக்கிய தீர்மானங்கள் எடுக்கப்படும் என எதிர்பார்க்கப்படுகிறது. எனினும் இதில் பாகிஸ்தான் மற்றும் தலிபான் ஆகியன பங்கேற்காததால் எடுக்கப்படும் தீர்மானங்கள் வெற்றி அளிப்பதில் சந்தேகம் தெரிவிக்கப்படுகிறது.

நேட்டோ படை தாக்குதலால் பாகிஸ்தான் வீரர்கள் கொல்லப்பட்டதற்கு எதிர்ப்பு தெரிவித்தே பாகிஸ்தான் இம் மாநாட்டை புறக்கணித்தமை குறிப்பிடத்தக்கது.

பொன் மாநாடு
* கடந்த 2001, செப்டெம்பர் 11 ஆம் திகதி நியூயோர்க் இரட்டைக் கோபுரங்கள் தகர்க்கப்பட்ட பின் ஆப்கானுக்குள் அமெரிக்கப் படைகள் ஊடுருவி, தலிபான்கள் ஆட்சியைக் கவிழ்த்தன.

* 2001, டிசம்பரில், ஜெர்மனியின் பான் நகரில், ஆப்கான் பிரதிநிதிகள், ஐ. நா. மற்றும் அமெரிக்க அதிகாரிகள் கலந்து கொண்ட முதல் பொன் நகர் மாநாடு நடந்தது.

* அதில், ஆப்கானில் நிலைத்த அரசு ஏற்படுத்துவதற்காக சர்வதேச சமூகத்தின் ஆதரவுடன் நேட்டோ படை ஆப்கானில் நிலை நிறுத்தப்பட ஒப்பந்தம் செய்யப்பட்டது.

* முதல் பொன் நகர் மாநாடு நடந்து முடிந்து தற்போது 10 ஆண்டுகளான நிலையில் இரண்டாவது பான் நகர் மாநாடு நேற்று நடந்தது.

* இதில் அமெரிக்கா, ஆப்பான் மற்றும் நேட்டோ அமைப்பின் உறுப்பு நாடுகளின் பிரதிநிதிகள் என பலர் கலந்து கொள்கின்றனர்.

* ஹக்கானி பயங்கரவாதக் குழு நிறுவனர் ஜலால்லுதீன் ஹக்கானியின் சகோதரர் ஹாஜி இப்ராகிம் உள்ளிட்ட பயங்கரவாத அமைப்புக்களின் பிரதிநிதிகள் சிலரும் கலந்து கொண்டதாக தகவல்கள் வெளியாகியுள்ளன.

* பஸ்தூன் பழங்குடியினப் பிரதிநிதிகளும் இம்மாநாட்டில் பங்கேற்றனர்.

* கேட்டோ தாக்குதலால் எரிச்சலடைந்துள்ள பாகிஸ்தான் இதில் கலந்துகொள்ள மறுத்துவிட்டது.

* 2014ல், நேட்டோ படைகள் ஆப்கானை விட்டு வெளியேறுகின்றன. அதையடுத்து ஆப்கானின் எதிர்காலம் எப்படி அமையப் போகிறது என்பது தான் இம்மாநாட்டின் முக்கிய விவாதப் பொருள்.