ஜன லோக்பால் மசோதாவுக்கு ஆதரவாக அன்னா ஹசாரே ஆதரவாளர்கள் டில்லியில் பேரணி

ஜன லோக்பால் மசோதாவுக்கு ஆதரவாக அன்னா ஹசாரே ஆதரவாளர்கள் டில்லியில் பேரணி
ஜன லோக்பால் மசோதாவுக்கு ஆதரவு திரட்டும் வகையில் அன்னா ஹசாரே ஆதரவாளர்கள் டில்லியில் நேற்று முன்தினம் பேரணி நடத்தினார்கள்.

வலுவான ஜன லோக்பால் மசோதாவை பாராளுமன்றத்தில் நிறைவேற்ற வேண்டும் என்று சமூக சேவகர் அன்னா ஹசாரே தலைமையிலான குழுவினர் மத்திய அரசை வற்புறுத்தி வருகிறார்கள்.

இந்த குளிர்கால கூட்டத் தொடரிலேயே மசோதாவை நிறைவேற்ற வேண்டும் என்றும், இல்லையேல் வருகிற 27 ம் திகதி முதல் ஜனவரி 5 ஆம் திகதி வரை டில்லியில் உள்ள ராம்லீலா மைதானத்தில் உண்ணாவிரதம் இருக்கப் போவதாக அன்னா ஹசாரே அறிவித்து உள்ளார்.

மேலும் மத்திய அரசு தயாரித்துள்ள வரைவு லோக்பால் மசோதாவுக்கு எதிர்ப்பு தெரிவித்து வருகிற 11 ஆம் திகதி ஒரு நாள் டில்லி ஜந்தர் மந்தரில் தர்ணா போராட்டம் நடத்தவும் அவர் தீர்மானித்து இருக்கிறார்.

இந்த நிலையில் ஜன லோக்பால் மசோதாவுக்கு ஆதரவு திரட்டும் முயற்சியாக டில்லியில் நேற்று முன்தினம் அன்னா ஹசாரே ஆதரவாளர்கள் பேரணி நடத்தினார்கள். பேரணியை அன்னா ஹசாரே குழுவைச் சேர்ந்த முன்னாள் பொலிஸ் அதிகாரி கிரண்பெடி கொடி அசைத்து தொடங்கி வைத்தார்.

மகாத்மா காந்தியின் சமாதி அமைந்துள்ள ராஜ்கொட்டில் இருந்து தொடங்கிய இந்த பேரணி துக்ளகாபாத் மைதானத்தில் முடிவடைந்தது. டில்லியின் பல்வேறு பகுதிகளிலும் இருந்து ஆர்வத்துடன் வந்திருந்த ஏராளமான பேர் பேரணியில் கலந்து கொண்டனர்.