பல்லாவரத்தில் வாழைப்பழம் தொண்டையில் சிக்கியதால் மாணவன் பரிதாப சாவு

by **நண்பன்** Tue 6 Dec 2011 - 8:37

சென்னையை அடுத்த கீழ்க்கட்டளை அம்பாள் நகர் ஸ்ரீராமானுஜம்
அப்பார்ட்மெண்டை சேர்ந்தவர் கிருஷ்ணகுமார். தனியார் கம்ப்யூட்டர்
நிறுவனத்தில் மேலாளராக வேலை பார்த்து வருகிறார். இவருடைய மனைவி
பாக்யலட்சுமி.

இவர்களுடைய ஒரே மகன் ஹரிஸ் சாய்நாதன்
(வயது 3 1/2). இவன் பல்லாவரத்தில் உள்ள ஒரு பள்ளியில் எல்.கே.ஜி படித்து
வந்தான். நேற்று காலை 8.45 மணிக்கு கிருஷ்ணகுமார் மகனை காரில் பள்ளியில்
விட்டு விட்டு வேலைக்கு சென்றார். காலை 10.15 மணிக்கு தேநீர் இடைவெளியில்,
பிறந்தநாள் கொண்டாடிய மாணவன் ஒருவன் அனைத்து மாணவர்களுக்கும் சாக்லெட்
கொடுத்தான். அதை வாங்கி ஹரிஸ் சாய்நாதன் சாப்பிட்டான்.

அதன்
பின்னர், ஹரிஸ் சாய்நாதன் வீட்டில் இருந்து கொண்டு வந்த பழம்,
பிஸ்கட்டுகளை சாப்பிட்டான். வாழைப் பழத்தைச் சாப்பிட்டபோது, அது திடீர்
என்று அவனது தொண்டையில் சிக்கிக்கொண்டது. இதனால் மூச்சுக்குழாயில் அடைப்பு
ஏற்பட்டு மூச்சு திணறி அவன் மயங்கி விழுந்தான்.

இதை
பார்த்த வகுப்பு ஆசிரியை ஈஸ்வரி, ஆயா கண்மணி, உடற்பயிற்சி ஆசிரியர்
சந்துரு ஆகியோர் ஹரிஸ் சாய்நாதனை அருகில் உள்ள தனியார் ஆஸ்பத்திரிக்கு
ஆட்டோவில் அழைத்து சென்றனர். அங்கு ஹரிஸ் சாய்நாதனை பரிசோதித்த டாக்டர்கள்
அவன் இறந்து விட்டதாக தெரிவித்தனர்.

உடனே இது
குறித்து அவனுடைய பெற்றோருக்கு தகவல் தெரிவிக்கப்பட்டது. அவர்கள் மகனின்
உடலை பார்த்து கதறி அழுதது நெஞ்சை உலுக்கியது. இந்த சம்பவம் தொடர்பாக
கிருஷ்ணகுமார் பல்லாவரம் போலீசில் புகார் செய்தார்.

புகாரில்,
பள்ளியில் முதலுதவி சிகிச்சை அளிக்ககூட டாக்டர் இல்லாத நிலையில் ஹரிஸ்
சாய்நாதன் மரணம் குறித்து உரிய விசாரணை நடத்தி நடவடிக்கை எடுக்க வேண்டும்
என்று தெரிவித்து இருந்தார்.

இந்த சம்பவம் தொடர்பாக
பல்லாவரம் போலீசார் வழக்குப்பதிவு செய்து ஹரிஸ் சாய்நாதனின் உடலை பிரேத
பரிசோதனைக்கு குரோம்பேட்டை மருத்துவமனைக்கு அனுப்பி வைத்தனர். பிரேத
பரிசோதனை அறிக்கையின்படி மாணவனின் மரணம் குறித்து உரிய நடவடிக்கை
எடுக்கப்படும் என போலீசார் தெரிவித்தனர்.

சென்னை
புறநகர் பகுதிகளில் உள்ள தனியார் பள்ளிகளில் ஆயிரக்கணக்கான மாணவர்கள்
படித்தாலும் எந்த பள்ளியிலும் மாணவர்களுக்கு முதலுதவி அளிக்கும்
மருத்துவர்கள் கிடையாது.

அதேபோல தீ விபத்து தடுப்பு
கருவிகள் உள்பட உயிர்காக்கும் தடுப்பு முன்னெச்சரிக்கை நடவடிக்கைகள்
எதுவும் இல்லை. இவற்றை சரிபார்க்க வேண்டிய கல்வி துறை அதிகாரிகள் அந்த
பணிகளை செய்வதில்லை. பல பள்ளிகளில் அளவுக்கு அதிகமாக மாணவர்களை சேர்த்து
விட்டு அவர்களை உரிய முறையில் கவனிப்பதில்லை.

5
வயதிற்குட்பட்ட குழந்தைகளை எல்.கே.ஜி., யூ.கே.ஜி. என சேர்த்து விட்டு
பள்ளியில் ஆசிரியைகள் கவனக்குறைவாக இருப்பதால் பல அசம்பாவிதங்கள்
நடைபெறுகின்றன. இதற்கு கல்வித்துறை உரிய உத்தரவுகளை வழங்கி மாணவர்களின்
பாதுகாப்புக்கு உரிய நடவடிக்கை எடுக்க வேண்டும்.

பல
தனியார் பள்ளிகளில் கழிப்பிடங்கள் சுகாதாரமற்ற முறையில் உள்ளன. இதனால்
பள்ளிக்குழந்தைகள் சிறு வயதிலேயே சிறுநீர் தொற்றுநோய்களால்
அவதிப்படுகின்றனர். கழிப்பறைகள் சுத்தமாக உள்ளதா? என்பதை உள்ளாட்சி
அமைப்பினர் ஆய்வு செய்வதில்லை. இவற்றிற்கெல்லாம் கல்வித்துறை அதிகாரிகள்
உரிய நடவடிக்கை எடுக்க வேண்டும் என பெற்றோர்கள் கோரிக்கை விடுத்துள்ளனர்.

மாலை மலர்