2011 இடாப்பில் பதிவு செய்யப்படாத 36,000 வாக்காளர் மீள விண்ணப்பம்

எம். எஸ். பாஹிம்
2011 வாக்காளர் இடாப்பில் உட்படுத்தப்படாத சுமார் 36 ஆயிரம் வடபகுதி வாக்காளர்கள் மீண்டும் தம்மை பதிவு செய்து கொள்ள விண்ணப்பித்துள்ள தாக தேர்தல் திணைக்களம் தெரிவித்தது.

இவர்களில் தகுதியானவர்களை உட்படுத்தும் நடவடிக்கை ஆரம்பிக்கப் பட்டுள்ளதாக யாழ், மற்றும் வன்னித் தேர்தல் அலுவலகங்கள் தெரிவித்தன. யாழ்ப்பாணத்தில் இருந்து வெளியேற்றப்பட்டு புத்தளத்தில் வசித்த சுமார் 1000 பேரும் இவ்வாறு தம்மை பதிவு செய்ய விண்ணப்பித்துள்ளனர்.

2010 வாக்காளர் இடாப்பில் பெருமளவான வடபகுதி வாக்காளர்கள் தம்மை பதிவு செய்திருக்காததால் யாழ்ப்பாணத்தில் இருந்து தெரிவு செய்யப்படும் எம்.பி.களின் தொகை குறைக்கப்பட்டது. இந்த நிலையில் 2011 வாக்காளர் இடாப்பில் தமது பெயரை உட்படுத்த அதிகமான வட பகுதி வாக்காளர்கள் தவறியிருந்தனர். இவர்களுக்கு தமது பெயரை உட்படுத்துவதற்காக விண்ணப்பம் செய்வதற்கு நவம்பர் 30 வரை கால அவகாசம் வழங்கப்பட்டது.

இந்தக் காலப் பகுதியில் யாழ். மாவட்டத்தைச் சேர்ந்த 29 ஆயிரம் வாக்காளர்களும் வன்னியைச் சேர்ந்த 7344 வாக்காளர்களும் புதிதாக விண்ணப்பித்துள்ளதாக மாவட்ட உதவி தேர்தல் அலுவலகங்கள் கூறின. வன்னி பிரதேசத்தில் மன்னாரில் இருந்து 4076 பேரும் வவுனியாவில் இருந்து 2268 பேரும் முல்லைத்தீவில் இருந்து 1000 பேரும் இவ்வாறு விண்ணப்பித்துள்ளனர்.

மார்ச் 31 ஆம் திகதி 2011 ஆம் ஆண்டுக்கான வாக்காளர் இடாப்பு பூர்த்தி செய்யப்பட்டு வெளியிடப்பட உள்ளது.

ஜனவரி மாதத்தினுள் புதிதாக விண்ணப்பித்துள்ள வாக்காளர்களின் விண்ணப்பங்கள் குறித்து மீளாய்வு செய்யப்பட உள்ளது.

சுமார் 36 ஆயிரம் பேர் புதிதாக பதிய விண்ணப்பித்துள்ளதால் எம்.பி.க்கள் தொகை குறைக்கப்படும் நிலை ஏற்படாது என தேர்தல் திணைக்கள வட்டாரங்கள் தெரிவித்தனர்.

இவ்வளவு காலம் பதியாமல் இருந்ததா ஆச்சரியமாக இருக்கிறதே