தமிழக-கேரள எல்லையில் ஐயப்ப பக்தர்கள் தவிப்பு: பெரியாறு அணை விவகாரத்தால் மோதல் முற்றுகிறது

முல்லைப் பெரியாறு பிரச்சினையால் தமிழகம், கேரள எல்லையில் இரண்டாவது நாளாக பதற்றம் நீடிக்கிறது. கம்பம் மெட்டு பகுதியில் 200 தமிழக ஜீப்புகள் அடித்து நொறுக்கப்பட்டன. பெரியாறு அணை விவகாரத்தால், தமிழக ஐயப்ப பக்தர்கள், பெரும் பாதிப்புக்கும் தவிப்புக்கும் உள்ளாகியுள்ளனர்.

முல்லைப் பெரியாறு பிரச்சினையில், கேரள கட்சிகளின் அடாவடி செயல்களால் தமிழகத்தின் எல்லையோரப் பகுதிகளான தேனி, கம்பம் கூடலூர் போடியில் மக்கள் கிளர்ந்து எழுந்தனர். ஆங்காங்கே மறியலில் ஈடுபட்டனர். கேரள முதல்வரின் உருவ பொம்மைகளை எரித்தனர். வாகனப் போக்குவரத்தை முழுமையாக தடுத்து நிறுத்தினர் கம்பத்தில் கடையடைப்பு நட்தி உம்மன் சாண்டி உருவப் பொம்மைகளை எரித்தனர். வன்முறைச் சம்பவங்களும் அரங்கேறின. கேரளாவில் எலத் தோட்டங்களுக்கு வேலைக்குச் சென்ற தமிழக தொழிலாளர்கள் தாக்கப்பட்டனர். 500 பேர் சிறை பிடிக்கப்பட்டனர். இதுகுறித்து அறிந்த தேனி மற்றும் இடுக்கி மாவட்ட கலெக்டர்கள் நடத்திய பேச்சுவார்த்தைக்குப்பின், நேற்றுமுன்தினம் அனைவரும் விடுவிக்கப்பட்டனர்.

இரு மாநில எல்லையில் பதற்றம் தொடர்வதால் பொலிஸாரும், தமிழ்நாடு சிறப்பு பட்டாலியன் படை பொலிசாரும் குவிக்கப்பட்டு உள்ளனர். நேற்று முன்தினம் இரண்டாவது நாளாக தமிழக பகுதிகளில் போராட்டத்தின் தீவிரம் நீடித்தது. கம்பத்தில் கடைகள் அடைக்கப்பட்டன. இதனால் கம்பம் உட்பட பல பகுதிகள் வெறிச்சோடின. கூடலூரிலும் கடைகள் அடைக்கப்பட்டன. கம்பம் கூடலூர், போடியில் இருந்து கேரளத்திற்குச்சென்ற வாகனங்களையும் மகக்ள் அனுமதிக்கவில்லை. போக்குவரத்து முழுமையாக நிறுத்தப்பட்டுள்ளது

அதேசமயம், தமிழகத்தில் இருந்து எலத் தோட்டங்களுக்கு தொழிலாளர்களை ஏற்றிச் சென்ற 1,000 ஜீப்புகளில், 200 க்கும் மேற்படட ஜீப்புகளை நேற்றுமுன்தினம் மாலை, கேரள போராட்டக்காரர்கள் அடித்து நொறுக்கினர். நடு வீதியில் 20 க்கும் மேற்படட ஜீப்புகளை கவிழ்த்து சேதப்படுத்தினர்.

கம்பமெட்டில் 144 தடை உத்தரவு பிறப்பிக்கப்பட்டுள்ளது. கம்பமெட்டில் நெடுங்கண்டம் வீதியில் உள்ள 50 க்கும் மேற்பட்ட தமிழர்களின் வீடுகள் மீது, கேரளகும்பல் தாக்குதல் நடத்தியது.

குமுளி பகுதி வழியாக சபரிமலை நோக்கிச் சென்று கொண்டிருந்த ஐயப்ப பக்தர்களின் வாகனங்களை சிலர் தடுத்து நிறுத்தி அதில் பயணம் செய்த ஐயப்ப பக்கதர்களை வாகனங்களில் இருந்து இறக்கி ஓட ஓட விரட்டி தாக்கினர். மேலும் அங்கிருந்த தமிழர்களின் ஹோட்டல்கள், கடைகள் ஆகியவற்றை உருட்டுக் கட்டையால் தாக்கி சேதப்படுத்தினர். சில தினங்களாக நடந்து வரும் இக்கொடுமையால் அச்சமடைந்த வியா பாரிகள் தங்களது கடைகளை மூடினர். ஐயப்ப பக்தர்கள் தொடர்ந்து அவ்வழியே செல்ல முடி யாத நிலை ஏற்பட்டதால் எத்தாபாளையம் லோயர் கேம்ப் பகுதியில் இருந்து கூடலூர் வரை 11 கி. மீ. தூரத்திற்கு வாகனங்கள் சாலையோரமாக நிறுத்தப்பட்டன. அவற்றில் பயணித்த பக்தர்கள், உணவுகூட கிடைக்காமல் அவதியுற்றனர்.

தமிழகத்தில் இருந்து செல்லும் ஐயப்ப பக்தர்களின் வாகனங்கள், குமுளி, கம்பம் மெட்டு, போடி மெட்டு வழியாக சபரிமலைக்கு செல்ல முடியவில்லை. கூடலூர் வரை வந்த நூற்றுக்கணக்கான ஐயப்ப பக்தர்களை கூடல் சுந்தர வேலவர் கோவில் திருமண மண்டபத்தில் தங்க வைத்தனர். கூடலூர் வரை வந்த பக்தர்கள் திரும்பி மாற்றுப் பாதையான செங்கோட்டை வழியாக செல்லலாம் என திட்டமிட்டு உள்ளனர். பல கி. மீ. தூரம் சுற்றி செங்கோட்டை வழியாக செல்லும் போது, அங்கும் பிரச்சினை ஏற்பட்டால் என்ன செய்வது என பக்தர்கள் புலம்பி வருகின்றனர்.

இதனால், சபரிமலைக்கு செல்லும் அய்யப்ப பக்தர்களின் பயணம் தடைபடும் நிலை ஏற்பட்டுள்ளது.