மாய மலர்கள்

by **மீனு** Thu 8 Dec 2011 - 23:16

மாய மலர்கள்

கொடிகள் இல்லாக் காட்டில் என்றும்
குலுங்கிச் சிரிக்கும் மலர்கள்!
செடிகள் இல்லாத் தோட்டம் ஒன்றில்
சிதறிக் கிடக்கும் மலர்கள்!
வேலி இல்லாப் பாத்தி தன்னில்
வெளிச்சம் சிந்தும் மலர்கள்!
கூலி தந்தே கூட்டி அள்ளிக்
குவிக்க வொண்ணா மலர்கள்!
காம்பு இல்லாத் தோற்றம் தந்து
கண்ணைச் சிமிட்டும் மலர்கள்!
கூம்பல் இல்லா நேர்த்தி கொஞ்சும்
கொள்ளை வனப்பு மலர்கள்!
மாலை சென்றால் சூட்டி அந்தி
மகிழும் தூய மலர்கள்!
காலை வந்தால் கூச்சம் கொண்டு
கலையும் மாய மலர்கள்!
நீரும் இல்லாத் தாக்கும் இன்றி
நித்தம் மலரும் மலர்கள்!
நாரில் ஒன்றாய்க் கோக்க வொண்ணா
நட்சத்திர மலர்கள்!