சிரிய வன்முறைகளால் பலியானோர் எண்ணிக்கை 5000 ஆக அதிகரிப்பு: 14,000 க்கும் மேற்பட்டோர் கைது

by *சம்ஸ் Wed 14 Dec 2011 - 6:16

ஐ. நா. மனித உரிமை ஆணையாளர் தகவல்
சிரியாவில் தொடரும் அரச எதிர்ப்பு ஆர்ப்பாட்டங்களில் கொல்லப்பட்டோர் எண்ணிக்கை 5 ஆயிரத்தை தாண்டி யுள்ளதாக ஐ.நாவின் மனித உரிமை ஆணையாளர் நவனீதன்பிள்ளை தெரிவித்துள்ளார்.

சிரிய விவகாரம் குறித்து ஐ. நா. பாதுகாப்புச் சபைக்கு விளக்கம் அளிக்கும் போதே அவர் இந்த தகவலை வெளியிட்டார். இந்த ஆண்டின் ஆரம்பம் தொட்டு சிரிய ஜனாதிபதி பஷர் அல் அசாத்திற்கு எதிராக நீடித்துவரும் மக்கள் ஆர்ப்பாட்டத்தின் மீது அந்நாட்டு பாதுகாப்பு படை தாக்குதல் நடத்தி வருகிறது.

இந்த விவகாரம் குறித்து நேற்று முன்தினம் பாதுகாப்பு சபையில் விசேட விவாதம் இடம்பெற்றது. இதில் ஐ. நா. மனித உரிமை உயர்ஸ்தானிகர் நவனீதன்பிள்ளையும் பங்கேற்றார்.

இதன்போது, சிரியாவில் தொடரும் வன்முறைகளால் 5000 க்கும் மேற்பட்டோர் கொல்லப்பட்டிருப்பதாக அவர் குறிப்பிட்டார். இதில் 14,000க்கும் மேற்பட்டோர் கைதுசெய்யப் பட்டுள்ளதோடு, பலியானோரில் குறைந்தது 300 சிறுவர்கள் அடங்குவதாக அவர் தெரிவித்தார்.

தவிர, சிரியாவில் தொடரும் வன்முறைகளால் 12,400 பேரளவில் அண்டிய நாடுகளில் தஞ்சம் புகுந்தியிருப்பதாக நவனீதன்பிள்ளை தெரிவித்தார். சிரியாவின் நிலவரம் தொடர்ந்து அபாயகரமாகவே இருப்பதாக அவர் சுட்டிக்காட்டினார்.

எனினும் இந்த தகவலை ஐ.நா.வுக்கான சிரிய தூதுவர் மறுத்துள்ளார். அடிப்படை அற்ற தகவல்கள் என அவர் குறிப்பிட்டுள்ளார்.

இந்நிலையில், பாதுகாப்புச் சபை சிரிய விவகாரத்தில் தனது நிலைப் பாட்டை மாற்றிக்கொள்ளும் நேரம் வந்துவிட்டதாக ஜெர்மன் வெளிவிவகார அமைச்சர் கிடோ வெஸ்டர்வெல் தெரிவித்துள்ளார். நவனீதன் பிள்ளையின் அறிக்கையை தொடர்ந்தே ஜெர்மன் வெளிவிவகார அமைச்சர் இவ்வாறு தெரிவித்தார். ‘இந்த தகவலை கேட்டு நான் அதிர்ச்சி அடைந்தேன். சிரியாவில் இடம்பெறும் வன்முறைகளுக்கு நாமும் பதில் கூறவேண்டும்’ என்றார். முன்னதாக சிரியா மீது ஐ. நா. பாதுகாப்புச் சபையில் கொண்டுவரப்பட்ட கண்டன தீர்மானத்திற்கு சீனா, ரஷ்யா நாடுகள் வீட்டோ அதிகாரத்தைப் பயன்படுத்தி நிராகரித்தமை குறிப்பிடத்தக்கது.