தமிழகம் - கேரளா இடையே சுமுக உடன்பாடு ஏற்பட வேண்டும்

by *சம்ஸ் Wed 14 Dec 2011 - 6:30

சமூக ஆர்வலர் மேதா பட்கர் பேச்சு
திருவனந்தபுரம்
முல்லை பெரியாறு அணையை உடைத்து விட்டு புதிய அணையை கட்ட வேண்டும் என்று கோரி இடுக்கி மாவட்டம் சப்பாத்து பகுதியில் கேரள மக்கள் தொடர் உண்ணாவிரத போராட்டம் நடத்தி வருகிறார்கள்.

உண்ணாவிரத பந்தலுக்கு சமூக ஆர்வலர் மேதா பட்கர் நேற்று முன்தினம் சென்றார். அங்கு அவர் பேசியதாவது :-

முல்லைப் பெரியாறு அணை பிரச்சினை தொடர்பாக கேரளா மற்றும் தமிழ்நாடு இடையே ஒரு இக்கட்டான சூழ்நிலை ஏற்பட்டு உள்ளது.

ஒரு பக்கம் விவசாயிகள் பாதிக்கப்படுவார்கள் என்றும், மற்றொரு பக்கம் அணை உடைந்தால் மக்கள் பலியாகும் நிலை ஏற்படும் என்றும் கூறப்படுகிறது.

இதில் விவசாயிகளைவிட மனித உயிர்களுக்கே முக்கியத்துவம் கொடுக்க வேண்டும்.

இதை புரிந்து கொண்டு கேரளா மற்றும் தமிழகம் ஆகிய 2 மாநிலங்களும் பிரச்சினைக்கு தீர்வுகாண முயல வேண்டும்.

இந்த விவகாரத்தில் மத்திய அரசு தலையிட்டு உடனடி தீர்வு ஏற்படுத்த வேண்டும்.

கேரள மக்களின் கருத்து என்ன என்பதையும், தமிழகத்தில் விவசாயம் பாதிக்கப்படுமா? என்பதையும் ஆராய்ந்து பார்த்து அதற்கு தீர்வு காண்பது மத்திய அரசின் கடமை.

மத்திய நீர்வள கமிஷன் இதற்கான ஏற்பாடுகளை தொடங்க வேண்டும். குறிப்பாக இந்தியாவில் 100 க்கும் மேற்பட்ட அணைகள் 50 முதல் 100 ஆண்டுகள் பழமைமிக்கதாக உள்ளது. இவற்றில், பூமி அதிர்ச்சி நில நடுக்கம், இயற்கை பேரழிவுகள் ஆகியவற்றால் பாதிக்கப்படுபவை எவை? என்பதை கண்டறிந்து அறிக்கை தயாரிக்க வேண்டும். அதன் அடிப்படையில் எந்தெந்த அணைகளை பராமரிப்பது? அகற்றுவது? என்பதை தீர்மானிக்க வேண்டும்.

முல்லை பெரியாறு விவகாரத்தை பொறுத்தவரை யாருக்கு தோல்வி என்பதை பார்ப்பதைவிட பிரச்சினைக்கு தீர்வு காண்பதைத்தான் முக்கியமாக கருத வேண்டும்.

அணை உடைந்தால் இடுக்கி மாவட்டத்தை சேர்ந்த 70 ஆயிரம் மக்கள் பாதிக்கப்படுவார்கள் என்பதை ஒதுக்கி தள்ளிவிட முடியாது.

எனவே இந்த பிரச்சினையில் விரைவாக இறுதி தீர்வு காண வேண்டும். இதில் இரு மாநிலங்களுக்கு இடையே சுமுகமான உடன்பாடு ஏற்பட வேண்டும் என்று விரும்புகிறேன். இவ்வாறு அவர் கூறினார்.