ரணில், கரு நியமனப் பத்திரம் தாக்கல்: நாளை நண்பகல் தேர்தல் _

ஐக்கிய தேசியக் கட்சியின் தலைமைப் பதவிக்கான தேர்தலில் போட்டியிடுவதற்கு கட்சியின் தற்போதைய தலைவர் ரணில் விக்கிரமசிங்கவும் இணைப் பிரதித் தலைவர் கரு ஜயசூரியவும் தமது நியமனப் பத்திரங்களை இன்று ஞாயிற்றுக்கிழமை தாக்கல் செய்துள்ளார்கள்.

கட்சியின் தலைமையகமான சிறிகொத்தாவில் தற்போது நடைபெறும் கட்சியின் விஷேட செயற்குழுக்கூட்டத்திலேயே இவர்கள் தமது நியமனப்பத்திரங்களைத் தாக்கல் செய்துள்ளார்கள். ஒன்றுக்கு மேற்பட்டவர்களின் பெயர்கள் தலைமைப் பதவிக்குப் பிரேரிக்கப்பட்டுள்ளமையால் கட்சி யாப்பு விதிகளின் படி அதற்கான தேர்தல் நடத்தப்பட வேண்டும்.

இதன்படி தலைமைப் பதவி உட்பட ஏனைய முக்கிய பதவிகளுக்கான தேர்தல் நாளை திங்கட்கிழமை நண்பகல் கட்சித் தலைமையகத்தில் நடத்தப்படும் எனவும் கட்சி வட்டாரங்கள் தெரிவித்தன.

கட்சியின் பிரதித் தலைவர், தேசிய அமைப்பாளர் பதவிகளுக்கும் ஒன்றுக்கு மேற்பட்டவர்களின் பெயர்கள் பிரேரிக்கப்பட்டிருப்பதால் அந்தப் பதவிகளுக்கும் தேர்தல்கள் நடைபெறும் எனத் தெரிவிக்கப்பட்டுள்ளது.

கட்சியின் பிரதித் தலைவர் பதவிக்கு ரவி கருணாநாயக்கவும், சஜித் பிரேமதாசவும் போட்டியிடுகின்றார்கள். தேசிய அமைப்பாளர் பதவிக்கு தயாசிறி ஜயசேகரா மற்றும் தயா கமகே ஆகியோரும் போட்டியிடுகின்றார்கள்.

ஐ.தே.க.வின் விஷேட செயற்குழுவின் கூட்டம் நடைபெறுவதை முன்னிட்டு கட்சித் தலைமையகமான சிறி கொத்தா அமைந்துள்ள பகுதிகளில் இன்று கடும் பாதுகாப்பு ஏற்பாடுகள் செய்யப்பட்டுள்ளன. ___