ஈராக்கிலிருந்து கடைசி அமெரிக்க வீரர்களும் வெளியேற்றம்

by *சம்ஸ் Mon 19 Dec 2011 - 6:27

ஈராக்கில் இருந்த கடைசி அமெரிக்க இராணுவ வீரர்களும் நேற்று வெளியேறினர். இதன் மூலம் கடந்த 9 ஆண்டுகளுக்கு பின்னர் ஈராக்கில் இருந்து அமெரிக்க படைகள் முழுமையாக வெளியேறியுள்ளன.

ஆயுதம் தரித்த 110 அமெரிக்க வாகனங்களை 500 வீரர்களுடன் ஈராக் நேரடிப்படி நேற்று காலை 7.38 மணிக்கு எல்லையை கடந்து குவைத்தை அடைந்தது. ஈராக்கின் தென்பகுதி பாலைவனத்தை கடந்த இந்த வீரர்கள் குவைத்தை எட்டினர்.

இவ்வாறு எல்லையை கடந்த அமெரிக்க வீரர்கள் குவைத் எல்லையில் இந்த வரலாற்று முக்கியத்துவம் வாய்ந்த நிகழ்வை கொண்டாடினர்.

ஏற்கனவே கடந்த வியாழக்கிழமை அமெரிக்க வீரர்கள் ஈராக்கில் இருந்து வெளியேறுவதை பக்தாத்தில் உள்ள அமெரிக்க இராணுவ தலைமையகத்தில் அமெரிக்க கொடியை இறக்கி சம்பிரதாயபூர்வமாக பதிவு செய்யப்பட்டது.

அமெரிக்க ஜனாதிபதி பராக் ஒபாமாவும் ஈராக்கில் இருந்து வெளியேறும் அமெரிக்க வீரர்களை உத்தியோபூர்வமாக வரவேற்றுள்ளார்.

இந்நிலையில் தற்போது ஈராக்கில் வெறும் 157 அமெரிக்க வீரர்களே உள்ளனர். இவர்கள் ஈராக்கில் உள்ள அமெரிக்க தூதரகத்தை பாதுகாக்கும் பணியிலும், ஈராக் வீரர்களுக்கு பயிற்சி அளிக்கும் பணியிலும் ஈடுபட்டுள்ளனர்.

கடந்த 2000 ஆம் ஆண்டு சதாம் ஹுஸைனின் அரசுக்கு எதிராக ஈராக் மீது படையெடுத்த அமெரிக்க படையை விலக்கிக்கொள்ளும் ஒப்பந்தம் கடந்த 2008 ஆம் ஆண்டு கைச்சாத்தனது. இதன் மூலம் ஈராக்கில் இருந்த 170,000 அமெரிக்க வீரர்கள் மற்றும் 500 முகாம்கள் படிப்படியாக அகற்றப்பட்டன.

இதுவரை ஈராக்கில் 4500 அமெரிக்க வீரர்கள் கொல்லப்பட்டுள்ளதோடு ஈராக் யுத்தத்திற்காக அமெரிக்கா ஒரு டிரில்லியன் டொலர்களை செலவு செய்துள்ளமை குறிப்பிடத்தக்கது.