போதையில் ஊழியர், ஆக்சிஜன் குழாயை எடுத்து விட்டதால், குழந்தை உயிரிழந்தது

by **நேசமுடன் ஹாசிம்** Wed 21 Dec 2011 - 7:36

மேற்கு வங்க அரசு மருத்துவமனையில் போதையில் இருந்த துப்புரவு ஊழியர், பச்சிளம் பெண் குழந்தைக்கு மாட்டியிருந்த ஆக்சிஜன் குழாயை எடுத்து விட்டதால், குழந்தை பரிதாபமாக இறந்தது.
மேற்கு வங்க தலைநகர் கொல்கத்தாவில் அரசு மருத்துவக் கல்லூரி மருத்துவமனை உள்ளது. இந்த மருத்துவமனையில் கடந்த அக்டோபரில் 45க்கும் மேற்பட்ட குழந்தைகள் வரிசையாக இறந்ததால், பெரிய போராட்டம் வெடித்தது. குழந்தைகள் இறப்புக்கு டாக்டர்களின் அலட்சியமே காரணம் என மக்கள் குற்றம்சாட்டினர். அது பற்றி விசாரணை நடத்த முதல்வர் மம்தா பானர்ஜி உத்தரவிட்டார்.

இந்நிலையில், அதே மருத்துவமனையில் மேலும் ஒரு துயர சம்பவம் நடந்துள் ளது. இரைப்பை கோளாறு காரணமாக மூச்சு விட முடியாமல் அவதிப்பட்ட பச்சிளம் குழந்தைக்கு இங்கு சிகிச்சை அளிக்கப்பட்டு வந்தது. பிறந்து 21 நாட்களே ஆன அந்த குழந்தைக்கு அருகிலேயே இருந்து, தாய் ஷோபா தாஸ் கவனித்து வந்தார்.

கடந்த 2 நாட்களுக்கு முன்பு, குழந்தை இருந்த அறையை சுத்தம் செய்ய வந்த ஒரு துப்புரவு ஊழியர் குடிபோதையில் இருந்துள்ளார். திடீரென அவர், குழந்தையின் சுவாசத்திற்காக முகத்தில் மாட்டியிருந்த ஆக்சிஜன் குழாயை எடுக்க முயன்றார். உடனே குழந்தையின் தாய் ஷோபா அலறியடித்து அவரை தடுத்தார். ஆனால், ஷோபாவை தள்ளி விட்ட அந்த ஊழியர், சுவாசக் குழாயை எடுத்துவிட்டார்.

இதற்கிடையே, ஷோபா ஓடிச் சென்று நர்சை அழைத்து வந்தார். நர்ஸ் வந்து பார்க்கையில் குழந்தைக்கு மூச்சுத் திணறல் ஏற்பட்டு, இறந்து விட்டாள். இச்சம்பவம் குறித்து பவ்பஜார் போலீசில் குழந்தையின் குடும்பத்தினர் புகார் கொடுத்தனர். எனினும், பச்சிளம் குழந்தையின் உடலை பிரேதப் பரிசோதனைக்கு கொடுக்காமல் குடும்பத்தினர் எடுத்து சென்று விட்டனர். இதனால், போலீசார் விசாரணையும் மேற்கொள்ளவில் லை. இதன்பின், குழந்தை இறந்ததது பற்றி விசாரித்து நடவடிக்கை எடுக்கப்படும் என்று கொல்கத்தா மருத்துவ கல்லூரி துணை முதல்வர் சித்தார்த்தா சக்ரவர்த்தி உறுதியளித்தார்.