ஈராக் துணை ஜனாதிபதிக்கு பிரதமர் கடைசி எச்சரிக்கை

by *சம்ஸ் Fri 23 Dec 2011 - 8:09

பயங்கரவாத அமைப்புடன் தொடர்புடையதாக குற்றம் சாட்டப்பட்டு பிடியாணை பிறப்பிக்கப்பட்டுள்ள ஈராக் நாட்டு துணைப் பிரதமர், குர்தீஷ் பகுதியில் பதுங்கியுள்ளார். அவர் தானாக சரணடைய வேண்டும் அல்லது குர்தீஷ் இனத்தவர்கள் அவரை அரசிடம் ஒப்படைக்க வேண்டும் என அந்நாட்டு பிரதமர் எச்சரிக்கை விடுத்துள்ளார்.

சுன்னி பிரிவைச் சேர்ந்தவர் தாரிக் அல்-ஹஸ்மி குர்தீஷ் இனத்தவருடன் சேர்ந்து கொண்டு, ஷியா பிரிவு ஆட்சியாளர்களுக்கு எதிராக செயல்பட பயங்கரவாதிகளுடன் தொடர்பு வைத்திருந்ததாக குற்றம் சாட்டப்பட்டு கடந்த வாரம், 5 நீதிபதிகளைக் கொண்ட நீதித்துறை குழு இவர் மீது பிடியாணை பிறப்பித்தது. தற்போது ஹஸ்மி தலைமறைவாகி உள்ளார்.

இந்நிலையில் பிரதமர் நூரி அல்-மாலிக் விடுத்துள்ள செய்தியில், துணை ஜனாதிபதி தாரிக்- அல்- ஹஸ்மிக்கு குர்தீஷ் இனத்தவர்கள் வாழும் பகுதியில் தான் பதுங்கியுள்ளார்.

தானாக சரணடைய வேண்டும், முன்பு சதாம் உஸைன் பிடிக்கப்பட்ட போது விசாரணை நியாயமாக நடந்தது. அதே போன்று தான் ஹஸ்மி மீதான விசாரணையும் நியாயமாக நடக்கும். ஈராக் அரசு எப்போதும் நீதித்துறையில் தலையிட்டதில்லை. எனவே குர்தீஷ் இனத்தவர்கள் அவரை சரணடைய சொல்ல வேண்டும் என்றார்.

இதற்கிடையே தன்மீதான குற்றச்சாட்டினை துணை ஜனாதிபதி தாரிக் அல்- ஹஸ்மி மறுத்துள்ளார். தற்போது உள்ள ஷியா பிரிவு அமைச்சரவையினையும், பாராளுமன்றத் தையும் புறக்கணிப்பு செய்து போராட்டம் நடத்துவதே எனது நோக்கமே தவிர பயங்கரவாத அமைப்புடன் தொடர்பில்லை என்றார்.