மட்டக்களப்பு தொலைபேசி விற்பனை நிலையம் ஒன்றில் பெண்கள் துஷ்பிரயோக நடவடிக்கை!

மட்டக்களப்பு மத்திய பஸ் நிலையத்தில் அமையப்பெற்றுள்ள கையடக்க தொலைபேசி விற்பனை நிலையம் ஒன்றில் பெண்கள் துஷ்பிரயோக நடவடிக்கையில் ஈடுபட்டதாகத் தெரிவித்து நேற்று அதனை மட்டக்களப்பு மாநகர சபையின் மட்டக்களப்பு மாநகர பிரதி முதல்வர் ஜோர்ஜ்பிள்ளை தலைமையிலான பொலிஸ் மற்றும் மாநகர ஊழியர்களால் சீல் வைத்து மூடப்பட்டுள்ளது.

குறித்த கடை தொடர்பில் கிழக்கு மாகாண முதலமைச்சர் சிவநேசதுரை சந்திரகாந்தன் மற்றும் மட்டக்களப்பு மாநகர முதல்வர் சிவகீதா பிரபாகரன் ஆகியோருக்கு பல்வேறு முறைப்பாடுகள் கிடைக்கப்பெற்றன.

இந்த முறைப்பாடுகள் குறித்த பகுதியில் வர்த்தக நிலையங்களை வைத்திருக்கும் வர்த்தகர்கள் பொதுமக்களால் தங்களுக்கு தெரிவிக்கப்பட்டதாக மட்டக்களப்பு மாநகர பிரதி முதல்வர் ஜோர்ஜ்பிள்ளை தெரிவித்தார்.

இதனைத் தொடர்ந்து இது தொடர்பக ஆராயும் பொருட்டு கிழக்கு மாகாண முதலமைச்சர் தலைமையில் முதலமைச்சரின் வாசஸ்தலத்தில் விசேட கூட்டம் ஒன்று இடம்பெற்றது.

இந்தக் கூட்டத்தில் மட்டக்களப்பு மாநகர முதல்வர் சிவகீதா பிரபாகரன், பிரதி முதல்வர் ஜோர்ஜ்பிள்ளை, மாநகர ஆணையாளர் சிவநாதன், மட்டக்களப்பு மத்திய பஸ் நிலையத்தில் வர்த்தக நிலையங்களைக்கொண்டுள்ள வர்த்தகர்கள் கலந்துகொண்டனர். இதன்போது குறித்த வர்த்தக நிலையத்துக்கு வரும் பெண்களுடன் முறைகேடான சம்பவங்களில் ஈடுபட்டுவருவதாக முதலமைச்சரின் கவனத்திற்கு வர்த்தகர்களால் கொண்டுவரப்பட்டதைத் தொடர்ந்து மேற்கொள்ளப்பட்ட விசாரணையின் அடிப்படையில் குறித்த கடையை சீல் வைத்து மூடுவதற்கு தீர்மானிக்கப்பட்டது.

இதேவேளை மட்டக்களப்பு நகரில் உள்ள அனைத்துக் கடைகளும் எதிர்காலத்தில் கண்காணிக்கப்படவுள்ளதாக தெரிவித்துள்ள மட்டக்களப்பு மாநகர சபை, முறைகேடான நடவடிக்கைகளில் ஈடுபடும் வர்த்தக நிலையங்கள் மூடப்படும் எனத் தெரிவித்துள்ளது. இதேநேரம் குறித்த வர்த்தக நிலையம் சீல் வைத்து மூடப்பட்டது தொடர்பில் குறித்த வர்த்தக நிலையத்தின் உரிமையாளரால் மட்டக்களப்பு பொலிஸ் நிலையத்தில் முறைப்பாடு செய்யப்பட்டுள்ளமை குறிப்பிடத்தக்கது.