சிறுநீரக நோயாளர்களின் Cyclosporin பாவனைக்கு தடை

by *சம்ஸ் Sat 24 Dec 2011 - 6:40

இந்திய கம்பனி ஒன்றினால் Alrita Pharma India எனும் பெயரில் உற்பத்தி செய்யப்படும் சைக்லொஸ்போரீன் எனும் சிறுநீரக நோயாளர்களுக்குப் பெற்றுக்கொடுக்கப்படும் மருந்தில் சந்தேகம் ஏற்பட்டுள்ளமையால் அக்கம்பனியினால் உற்பத்தி செய்யப்படும் மேற்படி மருந்து வகையினை உடனடியாக இடைநிறுத்துவதற்கு சுகாதார அமைச்சு தீர்மானித்துள்ளது.

சிறுநீரக மாற்று சத்திரசிகிச்சையின் போது இம்மருந்து பயன்படுத்தப்படுகின்றது. இம்மருந்தினை உட்கொண்டதன் பின்னர் குறித்த நோயாளர்களின் இரத்தத்திலுள்ள மருந்து மட்டம் பரீட்சிக்கப்படுவதுடன் ஆய்வுகூட அறிக்கையின் பிரகாரம் இதில் முன்னேற்றம் ஏற்படுவதில்லையென கொழும்பு தேசிய வைத்தியசாலை மற்றும் கண்டி போதனா வைத்தியசாலை என்பவற்றிலிருந்து முறைப்பாடுகள் கிடைக்கப் பெற்றுள்ளன.

எனவே, இந்த மருந்து வகை தொடர்பான மேற்படி செய்தியை அறிந்தவுடன் சுகாதார அமைச்சர் மைத்திரிபால சிறிசேன உரிய நடவடிக்கைகளை மேற்கொள்ளுமாறு உரிய அதிகாரிகளுக்கு பணிப்புரை விடுத்தார்.

அதன் பிரகாரம், மேற்படி நிறுவனம் உற்பத்தி செய்யும் சைக்லொஸ்போரீன்விyணீlosporin மில்லி கிராம் 100 மற்றும் 50 ரக வில்லைகளை உடனடியாக அரசாங்க மற்றும் தனியார் வைத்தியசாலைகளில் பயன்படுத்துவதனை இடைநிறுத்துவதற்கு தீர்மானிக்கப்பட்டுள்ளது.

மேலும் மருத்துவ வழங்கற் பிரிவில் களஞ்சியப்படுத்தி வைக்கப்பட்டுள்ள மேற்குறிப்பிட்ட கம்பனியின் மருந்து வகைகளை வைத்தியசாலைக்கு வழங்கும் பணியும் இடைநிறுத்தப்பட்டுள்ளது.

எனினும், நீண்ட காலமாக தரமான மருந்து வகைகளை விநியோகித்து வரும் சைக்லோஸ்போரீன் வில்லைகள் மருத்துவ வழங்கற் பிரிவிடம் காணப்படுவதனால் எதுவிதப் பிரச்சினையுமின்றி நோயாளர்களுக்கு குறித்த மருந்து வகையினை வழங்க முடியும் எனவும் தெரிவிக்கப்படுகின்றது.

மேலும் மேற்படி கம்பனி தொடர்பாக மேலதிக நடவடிக்கையினை மேற்கொள்ளுமாறு சுகாதார அமைச்சர் மைத்திரிபால சிறிசேன உரிய அதிகாரிகளுக்குப் பணிப்புரை விடுத்துள்ளார்.