24 வது நினைவு நாள்: எம். ஜி. ஆர். நினைவிடத்தில் ஜெயலலிதா அஞ்சலி

by *சம்ஸ் Mon 26 Dec 2011 - 6:34

அ.தி.மு.க. நிறுவனத் தலைவரும், முன்னாள் முதல்- அமைச்சருமான எம்.ஜி. ஆரின் 24 வது நினைவு தினம் மெரீனா கடற்கரையில் உள்ள அவரது நினைவிடத்தில் முதல்- அமைச்சர் ஜெயலலிதா சனிக்கிழமை காலை 10.45 மணி அளவில் மலர் வளையம் வைத்து அஞ்சலி செலுத்தினார்.

அங்கு அமைச்சர்கள், எம்.பி., எம்.எல்.ஏ.க்கள், கட்சி நிர்வாகிகள், தொண்டர்கள், ஏராளமான பொது மக்கள் திரண்டு இருந்தனர். ஜெயலிதா வந்ததும் “புரட்சித் தலைவர் புகழ் வாழ்க”, “புரட்சித் தலைவி வாழ்க” போன்ற கோஷங்களை எழுப்பினார்கள். அஞ்சலி செலுத்தியதும் நினைவிடத்தின் முன்பு அமைக்கப்பட்டு இருந்த மேடைக்கு ஜெயலலிதா வந்தார். அங்கு உறுதிமொழி ஏற்பும், மெளன அஞ்சலி செலுத்தும் நிகழ்ச்சியும் நடந்தது.

எம்.ஜி.ஆரின் புகழ் பற்றி அனைத்துலக எம்.ஜி.ஆர். மன்ற தலைவர் பி.எச். பாண்டியன் உரையாற்றினார். அதன் பிறகு அமைச்சர் ஓ. பன்னீர்செல்வம் உறுதிமொழி வாசிக்க அதை அனைவரும் திரும்ப கூறி உறுதி எடுத்துக் கொண்டனர்.

நிகழ்ச்சி முடிந்ததும் ஜெயலலிதா மேடையின் அனைத்து பகுதிகளுக்கும் சென்று தொண்டர்களைப் பார்த்து உற்சாகத்துடன் இரட்டை விரலை காண்பித்தார். பதிலுக்கு தொண்டர்களும் மகிழ்ச்சி ஆரவாரம் செய்தனர். நிகழ்ச்சி முடிந்ததும் ஜெயலலிதா காரில் புறப்படும் சென்றார்.