லோக்பால் சட்டமூலம் நிறைவேறியது: அரசியல் சாசன திருத்தத்துக்கு எதிர்ப்பு

புதுடில்லி:
லோக்பால் சட்டமூலம் லோக்சபாவில் நடந்த 11 மணி நேர விவாதத்திற்குப் பின் சில திருத்தங்களுடன் குரல் வாக்கெடுப்பு மூலம் நிறைவேறியது. ஆனால் அரசியல் சாசன திருத்தமளிப்பு மசோதா தோல்வியடைந்தது.

லோக்சபாவில் நேற்று முன்தினம் நடந்த விவாதத்தின் போது பெரும்பாலான அரசியல் கட்சிகள் லோக்பால் சட்டமூலத்தில் தற்போதைய வடிவத்திலேயே நிறைவேற்ற கடும் எதிர்ப்பு தெரிவித்தன. குறிப்பாக ஐக்கிய முற்போக்கு கூட்டணியில் அங்கம் வகிக்கும் திரிணாமுல் காங்கிரஸ் லோக்பால் மூலமாக மாநிலங்களில் லோக் ஆயுக்தா அமைக்கப்படும் என்ற விதிமுறையை கடுமையாக எதிர்த்தது.

மேலும் லோக்பால் சட்ட மூலத்தில் உள்ள பிரிவு எண் 24ல் மாற்றங்கள் செய்ய வேண்டும் என அனைத்து கட்சி உறுப்பினர்களுமே வலியுறுத்தினர். பிரிவு எண் 24 யின் படி எம்.பி.க்கள் மீதான ஊழல் வழக்குகளை லோக்பால் அமைப்பு விசாரிக்கும் போதே அவர்கள் மீது லோக்சபா சபாநாயகரோ, ராஜ்யசபா தலைவரோ நடவடிக்கை எடுக்க முடியும். இதுபோன்ற விதிமுறைகளை நீக்க வேண்டும் என அனைத்து கட்சியினரும் ஒருமித்த குரலில் எதிர்ப்புத் தெரிவித்தனர்.

லோக்சபாவில் 11 மணி நேரத்திற்கும் மேலாக விவாதம் நடந்தது. சபையின் முன்னவர் பிரணாப் முகர்ஜி விவாதத்திற்கு பதிலளித்து பேசும் போது திருத்தங்களை செய்ய அரசு முன்வருவதாகவும் தீர்மானத்தை நிறைவேற்றித் தர வேண்டும் என உறுப்பினர்களை கேட்டுக் கொண்டார். இதைத் தொடர்ந்து ஒவ்வொரு திருத்தமாக வாக்கெடுப்புக்கு எடுத்துக் கொள்ளப்பட்டது.

வாக்கெடுப்பு ஆரம்பித்ததும் பகுஜன் சமாஜ் கட்சி, சமாஜ்வாடி கட்சி உறுப்பினர்கள் வெளிநாடப்பு செய்தனர். லோக்பால் விசாரணை வரம்புக்குள் தனியார் நிறுவனங்களை கொண்டு வருவதற்கு உறுப்பினர்கள் எதிர்ப்பு தெரிவித்தனர். வாக்கெடுப்பு மூலம் இந்த திருத்தம் தோற்கடிக்கப்பட்டது. லோக்பால் வரம்புக்குள் தனியார் நிறுவனங்களை கொண்டு வருவதற்கு 69 பேர் ஆதரித்தும் 247 பேர் எதிர்த்தும் வாக்களித்தனர்.

லோக் ஆயுக்தா குறித்த அ.தி.மு.க.வின் திருத்தம் குரல் வாக்கெடுப்பு மூலம் நிராகரிக்கப்பட்டது. இதே போல பா.ஜ. கொண்டு வந்த 10 திருத்தங்கள் நிராகரிக்கப்பட்டது. இடதுசாரி கட்சி உறுப்பினர்கள் சார்பில் வைக்கப்பட்ட சில திருத்தங்களும் குரல் வாக்கெடுப்பு மூலம் நிராகரிக்கப்பட்டன. அரசின் சார்பில் வைக்கப்பட்ட ஏழு திருத்தங்கள் ஏற்றுக்கொள்ளப்பட்டன.

பிஜு ஜனதா தளம், இடதுசாரி கட்சிகள், அ.தி.மு.க. கட்சி உறுப்பினர்கள் வெளியேறிய நிலையில் திருத்தப்பட்ட லோக்பால் சட்ட மூலம் சில திருத்தங்களுடன் லோக்சபாவில் குரல் வாக்கெடுப்பு மூலம் நிறைவேற்றப்பட்டது. ஆனால் அரசியல் சாசன தகுதியளிப்பு சட்ட மூலம் தோல்வியடைந்தது.

எதிர்க் கட்சிகள் கொண்டுவரும் திருத்தங்கள் நிராகரிக்கப்பட்ட நிலையில் ஆகஸ்ட் மாதம் அரசு தரப்பில் கொண்டுவரப்பட்ட சட்டமூலம் தான் நிறைவேற்றப்பட்டு இருக்கிறது. அன்னா ஹசாரே வலியுறுத்திய ஜன் லோக்பால் சட்ட மூலத்தை கொண்டுவருவதற்கு அரசியல் வாதிகள் மறைமுக எதிர்ப்பைக் காட்டியுள்ளது. வெளிப்படையாக தெரிந்தது. லோக்சபாவில் நிறைவேறியதைத் தொடர்ந்து ராஜ்யசபாவிலும் நிறைவேற்றப்பட வேண்டும்.