தென்னாபிரிக்காவில் முதலாவது டெஸ்ட் வெற்றியை பெற்றது இலங்கை

தென்னாபிரிக்க அணியுடனான இரண்டாவது டெஸ்ட் கிரிக்கெட் போட்டியில் இலங்கை அணி 208 ஓட்டங்களால் வெற்றியீட்டியுள்ளது.
தென்னாபிரிக்காவில் இலங்கை அணி பெற்ற முதலாவது டெஸ்ட் போட்டி வெற்றி இதுவாகும்
டேர்பன் நகரில் நடைபெற்ற இப்போட்டியில் தென்னாபிரிக்க அணி வெற்றி பெறுவதற்கு இரண்டாவது இன்னிங்ஸில் 450 ஓட்ட இலக்கு நிர்ணயிக்கப்பட்டிருந்தது. ஆனால் போட்டியின் நான்காவது நாளான இன்று வியாழக்கிழமை அவ்வணி 241 ஓட்டங்களுடன் சகல விக்கெட்டுகளையும் இழந்தது.
அவ்வணியின் சார்பில் டி வில்லியர்ஸ் 69 ஓட்டங்களையும் ஹஸீம் அம்லா 51 ஓட்டங்களையும் பெற்றனர். பின்வரிசை வீரர் டேல் ஸ்டெய்ன் 43 ஓட்டங்களைப் பெற்றார்.
ஜக் கலிஸ் முதல் இன்னிங்ஸை போலவே இரண்டாவது இன்னிங்ஸிலும் ஓட்டமெதுவும் பெறாமல் ஆட்டமிழந்தார். 149 டெஸ்ட் போட்டிகளில் விளையாடிய அவர் இரு இன்னிங்ஸ்களிலும் ஓட்டமெதுவுமின்றி ஆட்டமிழந்தமை இதுவே முதல் தடவையாகும்.
இலங்கை அணி பந்துவீச்சாளர்களில் ரங்கன ஹேரத் 75 ஓட்டங்களுக்கு 5 விக்கெட்டுகளை வீழ்த்தினார். இப்போட்டியின் சிறப்பாட்டக்காரர் விருதையும் அவரே வென்றார்.
தில்ஹார பெர்னாண்டோ 29 ஓட்டங்களுக்கு 2 விக்கெட்டுகளையும் திலகரட்ன தில்ஷான் 35 ஓட்டங்களுக்கு ஒரு விக்கெட்டையும் திசேர பெரேரா 48 ஓட்டங்களுக்கு ஒரு விக்கெட்டையும் வீழ்த்தினார்.
2010 ஆம் ஆண்டு கடந்த ஓகஸ்ட் மாதம் காலியில் நடைபெற்ற இந்திய அணியுடனான போட்டியின்பின் இலங்கை அணி டெஸ்ட் போட்டியொன்றில் வெற்றி பெறுவது இதுவே முதல்தடவையாகும்.
இலங்கை அணி இதற்குமுன் இறுதியாக விளையாடிய 15 டெஸ்ட் போட்டிகளில் வெற்றி எதையும் பெறத் தவறியிருந்தது.
இவ்வருடத்தில் இலங்கை அணி பெற்ற முதலாவது டெஸ்ட் வெற்றி இதுவென்பது குறிப்பிடத்தக்கது.
1997 ஆம் ஆண்டின் பின்னர் இவ்வருடத்தில் ஒரு டெஸ்ட் போட்டியில்தானும் வெற்றி பெறாமல் போகக்கூடிய நிலையை இலங்கை அணி எதிர்நோக்கியிருந்தது. ஆனால் இவ்வருடத்தில் தனது கடைசி டெஸ்ட் போட்டியில் அரிய வெற்றியொன்றை இலங்கை அணி பெற்றுக்கொண்டது.
சுழற்பந்துவீச்சு ஜாம்பவான் முத்தையா முரளிதரன் ஓய்வு பெற்ற பின்னர், இலங்கை அணி டெஸ்ட் போட்டியொன்றில் வென்றமையும் இதுவே முதல் தடவையாகும்.
இத்தொடரின் முதலாவது போட்டியில் தென்னாபிரிக்க அணி வென்றது. இதனால் 3 போட்டிகள் கொண்ட இத்தொடரில் இரு அணிகளும் 1-1 விகிதத்தில் சமநிலையில் உள்ளன. 3 ஆவது போட்டி எதிர்வரும் 3 ஆம் திகதி கேப்டவுன் நகரில் ஆரம்பமாகவுள்ளது.

வெற்றிக்
கழிப்பு
என்றும்
தொடரும்...!!!

இந்த வெற்றி தொடர வாழ்த்திடலாம்