வெனிசுலாவில் பெற்றோல் தாங்கி வாகன விபத்தில் 18 பேர் பலி _

by **முனாஸ் சுலைமான்** Sat 31 Dec 2011 - 5:30

வெனிசுலாவில் பெற்றோல் தாங்கி வாகனமொன்று விபத்துக்குள்ளாகி தீப்பிடித்து எரிந்ததில் 18 பேர் பலியானதுடன் பலர் காயமடைந்துள்ளனர்.

தலைநகர் கரகஸில் இடம்பெற்ற இந்த விபத்தில் அப்பாதை வழியே சென்ற 7 கார்களும், பஸ்ஸொன்றும் தீக்கிரையாகியுள்ளன.

இந்நிலையில் எரிந்த வாகனங்களிலிருந்து கருகிய சடலங்களை மீட்கும் பணியில் மீட்புப் பணியாளர்கள் மும்மூரமாக ஈடுபட்டனர்.

எண்ணெய் தாங்கி வாகன சாரதியின் கட்டுப்பாட்டையிழந்து விபத்துக்குள்ளாகியதையடுத்து அதிலிருந்த பெற்றோல் வெளியே சிந்தி தீ அனர்த்தம் ஏற்பட்டதாக கூறப்படுகிறது.

விபத்தையடுத்து தீப்பற்றி எரிந்த பெற்றோல் ஆற்று வெள்ளம் போல் பாய்ந்ததில் அவ்வழியாக சென்ற ஏனைய வாகனங்களும் தீக்கிரையாகியுள்ளன.

சம்பவம் நடைபெற்ற இடத்துக்கு அருகிலுள்ள வீடுகளுக்கும் தீ பரவலாம் என்ற அச்சத்தில் அங்கிருந்த மக்கள் உடனடியாக பாதுகாப்பான இடங்களுக்கு இடம் பெயர்ந்தனர்.

எனினும் தீயணைப்பு படை வீரர்கள் துரிதமாக செயற்பட்டு தீயை கட்டுப்பாட்டுக்குள் கொண்டு வந்தனர்.

மேற்படி தீ அனர்த்தத்தையடுத்து அவ்வீதியிலான போக்குவரத்துக்கள் ஸ்தம்பிதமடைந்துள்ளன.

இந்த அனர்த்தத்தில் பலியானவர்களுக்கு வெனிசுலா ஜனாதிபதி ஹூலோ சாவேஸ் அனுதாபத்தை தெரிவித்துள்ளார். ___