8,462 ஆசிரியர்கள் நியமனம்: தமிழக அரசு உத்தரவு

8,462 ஆசிரியர்கள் நியமனம்: தமிழக அரசு உத்தரவு
மத்திய அரசு மூலம் தமிழகத்தில் செயல்படுத்தி வரும் மத்திய இடைநிலைக் கல்வி (ஆர்.எம்.எஸ்.ஏ) திட்டத்துக்கு தேவையான 6,872 கூடுதல் ஆசிரியர்கள் நியமிக்கப்பட உள்ளனர். மேலும் அரசு, நகராட்சி மேல் நிலைப்பள்ளிகளில் கூடுதலாக 1,590 முதுநிலை பட்டதாரி ஆசிரியர்கள் நியமிக்கப்பட உள்ளனர். மொத்தம் 8,462 ஆசிரியர்களை நியமிக்க தமிழக அரசு உத்தரவிட்டுள்ளது.

இது குறித்து தமிழக அரசு நேற்று முன்தினம் வெளியிட்ட உத்தரவில் கூறியிருப்பதாவது: அரசு உயர்நிலை, மேல்நிலைப் பள்ளிகளில் படிக்கும் மாணவர்களின் எண்ணிக்கைக்கு ஏற்ப 40 மாணவர்களுக்கு ஒரு ஆசிரியர் என்ற விகிதாசாரத்தில் 6,872 பட்டதாரி ஆசிரியர்கள் நியமிக்கப்பட உள்ளனர். மேலும், அரசு, நகராட்சி மேல்நிலைப் பள்ளிகளிலும் மேற்கண்ட விகிதாசாரப்படி கூடுதலாக 1,590 முதுநிலை பட்டதாரி ஆசிரியர்கள் நியமிக்கப்பட உள்ளனர். இதற்காக ஆண்டு ஒன்றுக்கு ரூ. 126 கோடியே 61 இலட்சம் செலவாகும்.

இது தவிர தொடக்கக் கல்வித் துறையில் பணியாற்றி ஓய்வு பெற்ற 3,137 தொடக்கப் பள்ளி ஆசிரியர்களுக்கு தேர்வு நிலை, சிறப்பு நிலையும் அனுமதிக்கப்படுகிறது. இதன்படி 1.6.1988க்கு முன்பு பணியாற்றிய இடைநிலை ஆசிரியர் மற்றும் தொடக்கப் பள்ளி தலைமை ஆசிரியர் பணிக் காலத்தை 01.06.1988க்கு பிறகு பணியாற்றிய பணிக்காலத்துடன் சேர்த்து தொடக்கப் பள்ளி தலைமை ஆசிரியர் பதவியில் தேர்வு நிலை சிறப்பு நிலை அனுமதித்து ஊதிய நிர்ணயம் செய்யப்படும். இதனால், அரசுக்கு ரூ. 24 கோடியே 24 இலட்சத்து 44 ஆயிரம் செலவாகும்.

தொழில் வர
வழம் பெறூம் நாடு...!!!