45 வயதிலேயும் அரசு வேலை

by **நேசமுடன் ஹாசிம்** Sat 31 Dec 2011 - 6:54

மேற்கு வங்காளத்தில் அரசு வேலையில் சேருவதற்கான வயது வரம்பு அதிகரிக்கப்பட்டுள்ளது. மேற்கு வங்காள மாநில அமைச்சரவை கூட்டம் முதல்வர் மம்தா பானர்ஜி தலைமையில் கொல்கத்தாவில் உள்ள அரசு தலைமைச் செயலகத்தில் நேற்று நடந்தது. அப்போது, அரசு வேலையில் சேருவதற்கான அதிகப்பட்ச வயதை அதிகரிக்க முடிவு செய்யப்பட்டது. இது குறித்து முதல்வர் மம்தா பானர்ஜி நிருபர்களிடம் கூறியதாவது:

அரசு வேலையில் சேருவதற்காக அதிகபட்ச வயது 32 ஆக இருந்தது. இதை 37 ஆக முந்தைய கம்யூனிஸ்ட் அரசு உயர்த்தியது. ஆனால், அந்த உத்தரவு 5 ஆண்டுகள் மட்டுமே நடைமுறையில் இருக்கும். இதன்படி, வரும் 31ம் தேதியுடன் அந்த உத்தரவு காலாவதியாகிவிடும். இதையடுத்து, மேலும் 5 ஆண்டுகளுக்கு, வயது வரம்பை 37 ஆக உயர்த்த அமைச்சரவை கூட்டத்தில் முடிவு செய்யப்பட்டுள்ளது. சி மற்றும் டி பிரிவு ஊழியர்களாக சேரும் பொதுப்பிரிவினருக்கு வயது வரம்பு 40 ஆகவும், எஸ்.சி, எஸ்.டி பிரிவினருக்கு 45 ஆகவும், பிற்படுத்தப்பட்ட வகுப்பினருக்கு 43 ஆகவும் உயர்த்தப்படும். இதனால், ஏராளமானவர்களுக்கு அரசு வேலை கிடைக்கும்.

மேற்கு வங்காளத்தில் அரசு மற்றும் தனியார் துறையில் புதிதாக வேலை வாய்ப்பை உருவாக்க அரசு தீவிரமாக முயற்சி செய்து வருகிறது. ஏற்கனவே 2.75 லட்சம் வேலைகள் புதிதாக உருவாக்கப்பட்டுள்ளன. மொத்தம் 5 லட்சம் புதிய வேலைகளை உருவாக்க இலக்கு நிர்ணயிக்கப்பட்டுள்ளது. இவ்வாறு மம்தா பானர்ஜி கூறினார்.