சென்னை துறைமுகம் அருகே தென்கொரிய சரக்கு கப்பல்

சென்னை துறைமுகம் அருகே தென்கொரிய சரக்கு கப்பல்
கப்பலை பார்க்க மக்கள் முண்டியடிப்பு
தானே புயல் காரணமாக சென்னை துறைமுகம் அருகில் நிறுத்தப்பட்டிருந்த தென்கொரிய நாட்டிற்கு சொந்தமான எம்.வி. ஓ.எஸ்.எம். அரேனா என்ற சரக்குக் கப்பல் மெரினா கடற்கரை அருகே கரையில் இருந்து 500 மீற்றர் தூரத்தில் தரை தட்டி நின்றது. பின்னர் இது நேற்று முன்தினம் இழுவை கப்பல்கள் மூலம் 15 மீற்றர் ஆழத்தில் நிலை நிறுத்தப்பட்டது.

இந்த கப்பலின் நங்கூரம் செயல்படாததால் காற்றில் மெல்ல மெல்ல நகர்ந்து கரைக்கு வந்து விடுகிறது. இந்நிலையில் மத்திய கப்பல் துறை அமைச்சர் ஜி.கே. வாசன், சென்னை துறைமுகத் தலைவர் அதுல்ய மிஸ்ரா ஆகியோர் நேற்று முன்தினம் படகில் சென்று தரை தட்டிய கப்பலை பார்வையிட்டனர். பின்னர், ரோந்து செல்வதற்கு பயன்படும் அதிவேக படகினை ஜி.கே. வாசன் சிறிது தூரம் ஓட்டினார்.

அரேனா கப்பலில் நங்கூரத்தை இயக்கும் கருவியை சரிசெய்த பிறகு துறைமுகத்தின் எல்லைக்கு வெளியே கப்பல் நிறுத்தப்படும். அதில் பணியாற்றும் பர்மாவைச் சேர்ந்த 14 பேரும் நலமாக உள்ளனர். அவர்களுக்கு உணவு மற்றும் அத்தியாவசிய பொருட்கள் மனிதாபிமான அடிப்படையில் வழங்கப்பட்டு வருகிறது.

கப்பலை பார்க்க குவிந்த கூட்டம் மெரினாவில் தரை தட்டி நிற்கும் அரேனா கப்பலை பார்க்க தினமும் ஏராளமானோர் கடற்கரைக்கு வருகின்றனர். புத்தாண்டை கொண்டாட கடற்கரையில் குவிந்த ஏராளமானோர் அரேனா கப்பலை பார்த்து ரசித்தனர். கப்பலை புகைப்படம் எடுத்துக் கொண்டனர்.