பாதிக்கப்பட்டவர்களுக்கு நிவாரணம் வழங்க வேண்டும்: விஜயகாந்த் வேண்டுகோள்

by *சம்ஸ் Tue 3 Jan 2012 - 6:41

பாதிக்கப்பட்டவர்களுக்கு நிவாரணம் வழங்க வேண்டும்: விஜயகாந்த் வேண்டுகோள்
‘தானே’ புயலால் பாதிக்கப்பட்ட மக்களுக்கு உடனடியாக நிவாரணம் வழங்க வேண்டும் என்று தே. மு. தி. க தலைவர் விஜயகாந்த் கோரிக்கை விடுத்துள்ளார்.

இது குறித்து ஞாயிற்றுக்கிழமை அவர் வெளியிட்ட அறிக்கை: தானே புயலால் கடலூர் மாவட்டம் மற்றும் புதுச்சேரியில் வரலாறு காணாத சேதம் ஏற்பட்டுள்ளது.

சூறாவளிக் காற்றினால் ஆயிரக்கணக்கான குடிசைகளும், ஓட்டு வீடுகளும் இருந்த இடம்தெரியாமல் போய் விட்டன. மேலும், முந்திரி, பலா, வாழை, தென்னந் தோப்புகள் கடும் சேதமடைந்துள்ளன. கரும்பு, நெற்பயிர்கள் மழை நீரில் மூழ்கிவிட்டன.

மீனவர்களின் படகுகளும், மீன்பிடி வலைகளும் சேதமடைந்து விட்டன. இதனால் அவர்களது வாழ்வாதாரம் முற்றிலும் பாதிப்படைந்துள்ளது. புயலால் பாதிக்கப்பட்ட மீனவர்களுக்கு இலவசமாக மீன்பிடி வலைகளையும், படகுகளையும் வழங்க அரசு நடவடிக்கை எடுக்க வேண்டும்.

பல பகுதிகளில் மின் கம்பங்கள் சேதமடைந்துள்ளதால், இருளில் மூழ்கியுள்ளன. மின்சாரம் கிடைக்காததால் குடிநீருக்கும், சமையல் செய்வதற்கும் தண்ணீரின்றி மக்கள் அவதிப்படுகின்றனர். கடந்த 30ம் திகதி தானே புயல் கரையை கடந்த பின், சீரமைப்புப் பணிகள் விரைவாக மேற்கொள்ளப்படவில்லை.

நிவாரணப் பணியில் முழு மூச்சுடன் ஈடுபட வேண்டிய தமிழக அரசு மெத்தனப் போக்குடன் உள்ளது. உடனடியாக அரசின் அனைத்துத் துறைகளையும் முடுக்கிவிட்டு, பாதிக்கப்பட்ட மக்களுக்கு தண்ணீரும், மின்சாரமும் கிடைக்க நடவடிக்கை எடுக்க வேண்டும்.

இது குறித்து உடனடியாக மத்திய அரசைத் தொடர்புகொண்டு நிவாரணத் திட்டத்தைச் செயல்படுத்த தமிழக, புதுவை அரசுகள் நடவடிக்கை எடுக்க வேண்டும் என்று விஜயகாந்த் கோரிக்கை விடுத்துள்ளார்.