அரசு ஊழியர், ஆசிரியர்கள் உட்பட 21 இலட்சம் பேருக்கு பொங்கல் போனஸ்

அரசு ஊழியர், ஆசிரியர்கள் உட்பட 21 இலட்சம் பேருக்கு பொங்கல் போனஸ்
அரச ஊழியர்களுக்கு பொங்கல் போனஸ் வழங்க முதல்வர் ஜெயலலிதா உத்தரவிட்டுள்ளார். இதன் மூலம் அரசு ஊழியர், ஆசிரியர்கள் முதல் ஓய்வு பெற்றவர்கள் வரை 21 இலட்சம் பேர் பயனடைவார்கள். இது குறித்து தமிழக அரசு நேற்று வெளியிட்ட அறிக்கை: அரசின் பல்வேறு நலத் திட்டப் பணிகளும் மற்றும் வளர்ச்சிப் பணிகளும் வெற்றிகரமாக செயல்படுத்தப்படுவதற்கு, உதவிகரமாக விளங்கும் அரசு ஊழியர்களுக்கு பொங்கல் பண்டிகையை முன்னிட்டு, மிகை ஊதியம் (போனஸ்) வழங்க முதல்வர் ஜெயலலிதா உத்தரவிட்டுள்ளார்.

இதன்படி 2010, 2011 ம் ஆண்டுக்கு "சி" மற்றும் "டி" பிரிவைச் சார்ந்த அலுவலர்கள் அனைவருக்கும் 30 நாட்கள் ஊதியத்துக்கு இணையாக ரூ. 3,000 உச்சவரம்புக்கு உட்பட்டு போனஸ் வழங்கவும், 'ஏ' மற்றும் 'பி' பிரிவைச் சார்ந்த அலுவலர்கள் அனைவருக்கும் ரூ. 1,000 சிறப்பு போனஸ் வழங்கவும், ஓய்வூதியம், குடும்ப ஓய்வூதியம் பெறுபவர்கள் மற்றும் முன்னாள் கிராம அலுவலர்கள் (முன்னாள் தலையாரி, காணம்) ஏனையோருக்கு ரூ. 500 பொங்கல் பரிசு வழங்கவும் முதல்வர் உத்தர விட்டுள்ளார்.

நிதியாண்டில் குறைந்த பட்சம் 240 நாட்கள் அல்லது அதற்கு மேலாக பணி புரிந்து, மாத அடிப்படையில் நிலையான ஊதியம் பெறும் முழு நேர மற்றும் பகுதி நேர சில்லறைச் செலவினப் பணியாளர்கள், தொகுப்பூதியம் பெறும் பணியாளர்கள், சிறப்புக் கால முறை ஊதியம் பெற்று வரும் சத்துணவுத் திட்டப் பணியாளர்கள், ஒருங்கிணைந்த குழந்தைகள் வளர்ச்சி பணிகள் திட்டத்தில் பணி புரியும் பணியாளர்கள் (அங்கன்வாடி பணியாளர்கள்).

குறு அங்கன்வாடி பணியாளர்கள் (மினி அங்கன்வாடி பணியாளர்கள்), கிராம உதவியாளர்கள், ஊரக வளர்ச்சி மற்றும் பஞ்சாயத்து ராஜ துறையில் பணி புரிந்து வரும் சிறப்பு காலமுறை ஊதிய விகிதத்தில் உள்ள பஞ்சாயத்து உதவியாளர்கள், மக்கள் நலப் பணியாளர்கள், ஒப்பந்தப் பணியாளர்கள், ஒப்பந்த அடிப்படையிலான தற்காலிக உதவியாளர்கள், தினக் கூலி அடிப்படையில் பணியாற்றும் மற்றும் ஒரு பகுதி தினக் கூலிகளாக பணியாற்றி, பின்னர் தொடர்ந்து நிரந்தர பணியாளர்களாக பணியாற்றியவர்களுக்கும், சிறப்பு மிகை ஊதியம் ரூ. 1,000 வழங்க முதல்வர் ஜெயலலிதா உத்தரவிட்டுள்ளார்.

உள்ளாட்சி நிறுவனங்கள் மற்றும் அரசு உதவி பெறும் கல்வி நிறுவனங்கள் ஆகியவற்றில் பணி புரியும் அலுவலர்கள் மற்றும் ஆசிரியர்கள், பல்கலைக்கழக மானியக் குழு, அனைத்திந்திய தொழில்நுட்பக் கல்விக்குழு, இந்திய வேளாண் ஆராய்ச்சிக் கழகத்தின் சம்பள விகிதம் மற்றும் அனைத்திந்தியப் பணி விதி முறைகளின் கீழ் வரும் அனைவருக்கும் இந்த போனஸ் வழங்கப்படும். இதனால் அரசுக்கு சுமார் 264 கோடி ரூபா செலவாகும்.

இவ்வாறு அறிக்கையில் கூறப்பட்டுள்ளது. கடந்த ஆண்டு பொங்கல் போனசுக்காக ரூ. 277 கோடி ஒதுக்கப்பட்டது. ஊழியர்களுக்கான போனஸ் ஜனவரி 5 ஆம் திகதி கிடைத்தது. இந்த ஆண்டு பொங்கல் போனசுக்காக ரூ. 264 கோடி ஒதுக்கப்பட்டுள்ளது. இந்த போனஸ் தொகை இன்று முதல் அவர்களுக்கு கிடைக்கும்.

எனக்கு ரூ. 1,000 சிறப்பு போனஸ்