தேவாலயங்களில் பயங்கரவாதத் தாக்குதல்: நைஜீரியாவில் 25 பேர் பலி

by *சம்ஸ் Mon 9 Jan 2012 - 6:26

நைஜீரியாவின் வட கிழக்குப் பகுதியில் உள்ள மாகாணத்தில், இரு வேறு இடங்களில் நடந்த துப்பாக்கிச் சூட்டு சம்பவங்களில், 25 பேர் பலியாகினர். இச் சம்பவங்களுக்கு, போகோ ஹராம் என்ற பயங்கரவாத அமைப்பு பொறுப்பேற்றுள்ளது.

நைஜீரியாவின் வட பகுதியில் முஸ்லிம்களும், தென் பகுதியில் கிறிஸ்தவர்கள் மற்றும் பழங்குடியினத்தோரும் பெரும்பான்மையாக உள்ளனர். வட பகுதியில், ஷரியத் சட்டத்தை அமுல்படுத்தக் கோரி, போகோ ஹராம் என்ற பயங்கரவாத அமைப்பு 2002 முதல் தொடர்ந்து வன்முறைகளில் ஈடுபட்டு வருகிறது. நாட்டின் வட பகுதியில் உள்ள இரு மாகாணங்களில் கடந்த கிறிஸ்மஸ் தினத்தன்று, இந்த அமைப்பு நடத்திய தாக்குதலில், 50 க்கும் மேற்பட்டோர் பலியாகினர்.

இந் நிலையில், நாட்டின் வட பகுதியில் உள்ள கிறிஸ்தவர்கள் அனைவரும் இன்னும் மூன்று நாட்களில் தென் பகுதிக்குச் சென்று விட வேண்டும் எனவும், இல்லையெனில் தாக்குதல்கள் தொடரும் எனவும், போகோ ஹராம் அமைப்பு சமீபத்தில் எச்சரித்திருந்தது. இதையடுத்து நேற்று முன்தினம் ஆதம்ஆவா மாகாணத்தில் முபி என்ற பகுதியில் உள்ள தேவாலயம் ஒன்றில் வழிபாடு நடந்து கொண்டிருந்த போது, மர்ம நபர் ஒருவர் துப்பாக்கிச் சூடு நடத்தினார். இதில் 17 பேர் பலியாகினர். யோலா என்ற இடத்தில் உள்ள தேவாலயத்தில் நடந்த தாக்குதலில், 8 பேர் பலியாகினர். இதையடுத்து, ஆதம்ஆவா மாகாணத்தில் அரசு அவசர நிலை உத்தரவு பிறப்பித்துள்ளது.