விண்கலப் பயணத் தோல்விக்கு வெளிநாட்டு சக்திகளே காரணம்

ரஷ்யா குற்றச்சாட்டு
சமீபகாலமாக எங்கள் நாட்டு விண்கலங்களின் பயணம் தோல்வி அடைவதற்கு வெளிநாட்டு சக்திகளே காரணம் என்று ரஷ்ய விண்வெளிக் கழகத்தின் தலைவர் விளாதிமிர் போவாவ்கின் குற்றம் சுமத்தினார்.

சமீபகாலமாக ரஷ்ய விண்கலங்களின் பயணங்கள் தோல்வியைச் சந்தித்து வருகின்றன. கடந்த நவம்பரில் செவ்வாய்க்கிரகத்துக்கு அனுப்பப்பட்ட போபஸ் கிரண்ட் என்ற விண்கலப் பயணம் தோல்வி அடைந்தது. அந்த விண்கலத்தில் இருந்த ரொக்கெட், நிர்ணயிக்கப்பட்ட நேரத்தில் செயல்படவில்லை. இதனால் அந்த விண்கலம் பூமியின் சுற்றுவட்டப் பாதையிலேயே மோதி சிதறியது. இது ரஷ்யாவுக்கு அதிர்ச்சியை ஏற்படுத்தியது.

இந்நிலையில் இது போன்ற ரஷ்ய விண்கலப் பயணங்களின் பின்னடைவுக்கு வெளிநாட்டு சக்திகள்தான் காரணம் என்று அந்நாட்டு விண்வெளிக் கழகத் தலைவர் விளாதிமிர் போவாவ்கின் குற்றம் சுமத்தியுள்ளார். யாரையும் குற்றம் சாட்ட நாங்கள் விரும்பவில்லை. இருப்பினும் இந்த விடயத்தை சாதாரணமாக எடுத்துக் கொள்ள முடியாது என்றும் அவர் குறிப்பிட்டுள்ளார். போபஸ் கிரண்ட் விண்கலம் அனுப்பப்பட்ட போது அதன் பயணத்தை எங்களால் ரேடாரால் கண்காணிக்க முடியவில்லை நாங்கள் பல தடவை முயற்சித்தும் இயலவில்லை. இது ஏன் என்று புரியவில்லை என்றும் அவர் கூறினார்.