விரல்கள்

by **மீனு** Fri 13 Jan 2012 - 0:53

விரல்கள்
=======

இரண்டு கைகள் சேர்ந்திங்கே

இதமாய் வணக்கம் செய்கையிலே

எதிரில் இருப்போர் முன்பாக

இருந்தன இரண்டு சுண்டுவிரல்!

ஆதலால் நாங்களே விரலுக்குள்

ஓதும் முதற்புகழ் பெற்றதென

மோதல் கருத்தைத் தூண்டியதால்

மோதிர விரல்கள் பேசினவே!

விலை உயர்ந்த மோதிரத்தை

நிலையாய் அணியும் தரத்தாலே

மோதிர விரல்கள் எனப்பட்டோம்

மோதா தீரெனச் சொல்லினவே!

அதற்குள் நடுவிரல் ஆர்ப்பரித்துப்

பொதுவாய் நாங்களே உயரத்தால்

பொதிய மலைபோல் இருப்பதினால்

எதுவும் எம்கீழ் சென்றனவே!

சும்மா இருந்த ஆள் காட்டிவிரல்

சுட்டி ஒன்றைக் கூறுதற்குச்

சுகமாய் உங்களுள் யாரென்று

சுருக்காய்த் தம்மைப் புகழ்ந்தனவே!

இதனைக் கேட்ட கட்டைவிரல்

எழுத உண்ண இவைபோல

எதனைச் செயினும் எமையின்றி

எதுவும் நடக்கா தென்றனவே!

இப்படி யாக விரல்களெல்லாம்

செப்பிய தனித்தனிப் பண்பாலே

ஒப்புயர் வெல்லாம் வளர்ந்திடுமோ?

ஒப்பிடும் ஒற்றுமை இல்லாமல்!

விரல்கள் புகட்டிய பாடத்தை

விரிந்த உலகில் மனிதரெல்லாம்

உரசல் இன்றி உணர்ந்திட்டால்

உறவுடன் ஒற்றுமை ஓங்கிடுமே!