இறந்த உடல்கள் மீது அமெ. வீரர்கள் சிறுநீர் கழிக்கும் வீடியோ இணையத்தளங்களில்

by *சம்ஸ் Fri 13 Jan 2012 - 10:10

கொல்லப்பட்ட மூவரது உடல்கள் மீது அமெரிக்க படை வீரர்கள் சிறுநீர் கழிப்பது போன்ற வீடியோ இணைய தளங்களில் வெளியாகி சர்ச்சையை கிளப்பியுள்ளது. யூடியுப் போன்ற பிரபல இணைய தளங்களிலும் இந்த வீடியோ வெளியாகியுள்ளது.

இதில் ரத்தம் தோய்ந்த நிலையில் கொல்லப்பட்ட முவரது உடல்கள் மீது அமெரிக்க இராணுவ உடை அணிந்த நான்கு பேர் சிறுநீர் கழிக்கின்றனர்.

அதில் சிறுநீர் கழிக்கும் ஒருவர், இன்று நல்ல நாள்’ என்று கூறுகிறார். மற்றுமொருவர், ‘இதனை வீடியோவில் பதிவுசெய்கிறாயா’ என்று மற்றொருவரிடம் கேட்கிறார்.

அதற்கு மற்றுமொரு குரல் ‘ஆம்’ என்று பதில் அளிக்கிறது. இதனையடுத்து மற்றுமொரு குரல் ‘தங்கக் குளியல்’ என நகைச்சுவையாக குறிப்பிடுவது இந்த வீடியோவில் பதிவு செய்யப்பட்டுள்ளது. இந்த வீடியோ 30 வினாடிகள் நீடிக்கிறது.

இந்த வீடியோவை ஆராய்ந்த அமெரிக்க இராணுவத்தின் சிரேஷ்ட அதிகாரி ஒருவர் அது அமெரிக்க இராணுவ வீரர்கள் என்பதை உறுதி செய்துள்ளார். இந்த இராணுவ வீரர்கள் அணிந்துள்ள உடை மற்றும் ஆயுதங்களை ஆய்வு செய்த அந்த அதிகாரி இவர்கள் அமெரிக்க இராணுவத்தின் ஸ்னைப்பர் படையைச் சேர்ந்தவர்கள் என்று குறிப்பிட்டுள்ளார்.

இது தொடர்பில் விசாரணை நடத்தி வருவதாகக் குறிப்பிட்டுள்ள அமெரிக்க இராணுவம், இந்த இராணுவ வீரர்களை விரைவில் கண்டுபிடிக்க முடியும் என கூறியுள்ளது.

இந்த வீடியோ ஆப்கானில் எடுக்கப்பட்டிருக்கலாம் என சந்தேகிக்கப்படுகிறது.