மாயாவதிக்கு தினமும் ரூ. 100 கோடி ஊழல் பணம்

by *சம்ஸ் Fri 13 Jan 2012 - 10:21

உத்தரப் பிரதேச முதல்வர் மாயாவதிக்கு தினமும் ரூ. 100 கோடி ஊழல் பணம் கிடைப்பதாக சமாஜ்வாடி கட்சி தலைவர் முலாயம் சிங் யாதவின் மகன் அகிலேஷ் யாதவ் குற்றம் சாட்டியுள்ளார்.

ஷரவாஸ்தி என்ற இடத்தில் நடந்த சமாஜ்வாடி கட்சி பொதுக் கூட்டத்தில் அகிலேஷ் யாதவ் பேசியதாவது, முதல்வர் மாயாவதியின் ஆட்சியில் ஊழல் அதிகரித்து விட்டது. சட்டம் ஒழுங்கு சீர்குலைந்துள்ளது. மாநில அமைச்சர்களில் 25 க்கும் மேற்பட்டோர் ஊழல் குற்றச்சாட்டில் சிக்கியுள்ளனர்.

ஊழல் செய்யும் அமைச்சர்களிடம் இருந்து மாயாவதிக்கு பங்கு செல்கிறது. ஊழல் அமைச்சர்கள், பகுஜன் சமாஜ் கட்சி தலைவர்கள், அதிகாரிகளிடம் இருந்து மாயாவதிக்கு தினமும் குறைந்தது ரூ. 100 கோடி ஊழல் பணம் கிடைக்கிறது. ஊழல் செய்த பணத்தின் மூலம் தேர்தலை சந்திக்க மாயாவதி முயற்சிக்கிறார்.

பண ஆதிக்கத்தை தேர்தல் ஆணையம் தடுத்து நிறுத்த வேண்டும். மாயாவதி மற்றும் அவரது கட்சியின் சின்னமான யானை சிலைகளை மூட தேர்தல் ஆணையம் உத்தரவிட்டது வரவேற்கத்தக்கது.

முஸ்லிம்களுக்கு இட ஒதுக்கீடு அளிக்கும் விவகாரத்தில் காங்கிரஸ் இரட்டை வேடம் போடுகிறது. பிற்படுத்தப்பட்டோருக்கான ஒதுக்கீட்டின் 4.5% முஸ்லிம்களுக்கு ஒதுக்கப்படும் என்று அரசு அறிவித்துள்ளது. ஆனால், மத்திய அமைச்சரும் காங்கிரஸ் தலைவருமான சல்மான் குர்ஷித், 9% இட ஒதுக்கீடு அளிக்கப்படுவதாக கூறி ஏமாற்றுகிறார். முஸ்லிம்கள் இட ஒதுக்கீடு தொடர்பாக காங்கிரஸ் குழப்பத்தில் உள்ளது. இவ்வாறு அகிலேஷ் யாதவ் பேசினார்.