விழுப்புரம் அருகே கார்-பஸ் மோதல்: 3 பேர் நசுங்கி சாவு

by **நண்பன்** Wed 18 Jan 2012 - 10:35

சென்னை மேடவாக்கத்தை சேர்ந்தவர் ராகுல் கார்த்திக் (வயது 29). இவரது
மனைவி விநாயகலட்சுமி. இவர்கள் 2 பேரும் கம்ப்யூட்டர் என்ஜினீயர்கள்.
இவர்களுடைய மகன் பிரஜன் அபிநந்தன் (5 மாத கைக்குழந்தை), விநாயகலட்சுமியின்
தாயார் நாதசுப்புலட்சுமி (51) ஆகியோர் பொங்கல் விழாவுக்காக சொந்த ஊரான
விருதுநகர் மாவட்டம் அருப்புக்கோட்டைக்கு காரில் சென்றனர்.

பொங்கல்
விழாவை உறவினர்கள், நண்பர்களுடன் சேர்ந்து ராகுல் கார்த்திக்
குடும்பத்தினர் மகிழ்ச்சியாக கொண்டாடினார்கள். பின்னர் அவர்கள் மீண்டும்
சென்னைக்கு காரில் புறப்பட்டனர். உறவினர் ஆழ்வார்சாமி (50) காரை
ஓட்டினார். விழுப்புரம் அருகே உள்ள திருவாமாத்தூர் பகுதியில் அந்த கார்
வந்து கொண்டிருந்தது. கண்ணிமைக்கும் நேரத்தில் அந்த காரும், அந்த வழியாக
வந்த அரசு டவுன் பஸ்சும் மோதியது.

இதில் கார்
அப்பளம் போல் நொறுங்கியது. காரின் இடிபாடுகளுக்குள் சிக்கி உடல் நசுங்கி
நாதசுப்புலட்சுமி பலியானார். காரில் பயணம் செய்த மற்ற 4 பேரும்
படுகாயமடைந்து அலறினார்கள். அந்த சத்தம் கேட்டு அக்கம் பக்கத்தினர்
ஓடிவந்து காயமடைந்தவர்களை இடிபாடுகளில் இருந்து மீட்டனர். அவர்களை
முண்டியம்பாக்கம் அரசு ஆஸ்பத்திரிக்கு கொண்டு சென்றனர்.

ஆனால்
வழியிலேயே பிரஜன் அபிநந்தனும், ஆழ்வார்சாமியும் துடிதுடித்து இறந்தனர்.
ராகுல்கார்த்திக், விநாயகலட்சுமி ஆகியோர் ஆஸ்பத்திரியில் சேர்க்கப்பட்டனர்.
அவர்கள் 2 பேருக்கும் தீவிர சிகிச்சை அளிக்கப்பட்டு வருகிறது. விபத்து
குறித்து விழுப்புரம் தாலுகா போலீசார் வழக்குப்பதிவு செய்து விசாரணை நடத்தி
வருகின்றனர்.