சசிகலாவின் தம்பி திவாகரன் தப்பிச் செல்ல காரணமான பொலிஸார் குறித்து விசாரணை

சசிகலாவின் தம்பி திவாகரன் தப்பிச் செல்ல காரணமான பொலிஸார் குறித்து விசாரணை
சசிகலாவின் தம்பி திவாகரனை தப்பிக்க வைத்த திருவாரூர் மாவட்ட பொலிஸ் துறையில் உள்ள திவாகரன் செயலாளர்கள் குறித்து தீவிர விசாரணை நடந்து வருகிறது.

சசிகலா நீக்கத்துக்கு பிறகு அ.தி.மு.க. கட்சியிலும், ஆட்சியிலும் அதிகமாக ஆட்டம் போட்ட சசிகலாவின் தம்பி திவாகரனின் ஆதரவு பொலிஸ் அதிகாரிகள், திருவாரூர் மாவட்டத்தில் இருந்து வேறு மாவட்டங்களுக்கு மாற்றப்பட்டனர்.

திவாகரன் மீதான புகார்கள் தூசு தட்டப்பட்டன. திவாகரன் மீது வீடு இடிப்பு புகார் கொடுத்த ரிஷியூரை சேர்ந்த பாலசுப்ரமணியன் மனைவி கஸ்தூரி, திருவாரூர் எஸ்.பி. அலுவலகத்துக்கு அழைக்கப்பட்டார். அவரிடம், எஸ்.பியே நேரடியாக புகாரை பெற்றுக்கொண்டார்.

எந்தெந்த பிரிவுகளில் வழக்குப் பதிவு உள்ளிட்ட அனைத்து விடயங்களிலும், எஸ்.பியே முடிவெடுத்தார். மேலிடத்துக்கு தகவல் கொடுத்தார். திவாகரன் கைதுக்கு அனுமதி கிடைத்தது. திவாகரனை கைது செய்ய எஸ்.பி.யே நேரடியாக சுந்தரக் கோட்டைக்கு சென்றார்.

இதற்குள் அரசல் புரசலாக விடயத்தைத் தெரிந்து கொண்ட பொலிஸ் துறையைச் சேர்ந்த திவாகரன் ஆதரவு பொலிஸார், திவாகரனுக்கு, தகவல் கொடுத்தனர்.

அன்று மாலை 4 மணி வரை சுந்தரக் கோட்டையில் உள்ள தன் கல்லூரியில் இருந்த திவாகரன், எஸ்.பி. தலைமையிலான பொலிஸ் படை, மாலை 5.30 மணிக்கு கல்லூரிக்குள் நுழைந்த போது மாயமானார். இரவு நீண்ட நேரம் வரை தேடுதல் வேட்டை நடத்தியும், திவாகரன் கிடைக்கவில்லை.

திவாகரனுக்கு தகவல் கொடுத்த பொலிஸார்கள் குறித்து அதிர்ச்சியடைந்த எஸ்.பி. நேற்று முன்தினம் இரகசிய விசாரணை மேற்கொண்டார். திவாகரன் கல்லூரி பஸ்ஸில் ஏறி தப்பித்து செல்வதற்கு தகவல் கொடுத்த பொலிஸ் அதிகாரிகள் குறித்தும், விசாரணை நடத்தப்பட்டது. உளவுத்துறையினரும், தனிப்பட்ட முறையில் விசாரணை நடத்துக்கின்றனர்.

திவாகரனுக்கு விசுவாசமான அ.தி.மு.க. ஆதரவு, தொலைக்காட்சி நிருபர்கள் தான், அவரை உஷார்படுத்தியதாகவும் கிடைத்துள்ள தகவல் அடிப்படையில் உளவுத் துறையினர் தீவிரமாக விசாரணை நடத்தி வருகின்றனர்.