அரபு லீக் கண்காணிப்பு பணியை நீடிக்க சிரிய அரசு இணக்கம்

அரபு லீக் கண்காணிப்பு பணியை நீடிக்க சிரிய அரசு இணக்கம்
கண்காணிப்பு பணியிலிருந்து வளைகுடா நாடுகள் வெளியேற்றம்
அரபு லீக் கண்காணிப்பு பணியை ஒரு மாதத்திற்கு நீடிப்பதற்கு சிரிய அரசு இணக்கம் தெரிவித்துள்ளது. சிரியாவில் தொடரும் அரபு லீக் கண்காணிப்பு பணிகளில் இருந்து 6 வளைகுடா நாடுகளும் விலகிக் கொண்ட நிலையிலேயே சிரிய அரசு இந்த அறிவிப்பை வெளியிட்டுள்ளது. இது தொடர்பில் சிரிய வெளியுறவு அமைச்சர் வலித் முல்லம் அரபு லீக் செயலாளர் நாயகத்திற்கு கடிதம் மூலம் உத்தியோக பூர்வமாக அறிவித்துள்ளார். இதற்கமைய எதிர்வரும் பெப்ரவரி 23 ஆம் திகதி வரை கண்காணிப்பு பணிகளை நீடிக்க இணக்கம் தெரிவிக் கப்பட்டுள்ளது.

எனினும் அரபு லீக்கில் உள்ள வளைகுடா ஒத்துழைப்பு கவுன்ஸில் நாடுகளான சவூதி அரேபியா, பஹ்ரைன், குவைட், ஓமான், கட்டார் மற்றும் ஐக்கிய அரபு இராச்சியம் ஆகிய நாடுகள் தமது கண்காணிப்பாளர்களை சிரியாவில் இருந்து திருப்பி அழைத்துக்கொண்டுள்ளன.

சிரியாவில் அரபு லீக் தீர்வுத் திட்டத்தை நடைமுறைப்படுத்த ஐ.நா. பாதுகாப்புச் சபை அழுத்தம் கொடுக்க வேண்டும் என அந்த நாடுகள் கோரியுள்ளன. இதேவேளை ஐ. நா. பாதுகாப்பு சபையில் சிரியாவுக்கு எதிராக மீண்டும் ஒருமுறை கண்டன தீர்மானம் நிறைவேற்ற ஐரோப்பிய மற்றும் அரபு நாடுகள் திட்டமிட்டுள்ளன. இந்த தீர்மானம் அடுத்தவாரம் பாதுகாப்புச் சபையில் முன்வைக்க திட்டமிடப்பட்டு ள்ளது. கடந்த முறை கொண்டு வரப்பட்ட கண்டனத் தீர்மானத்தை ரஷ்யா, சீனா ஆகிய நாடுகள் தமது வீட்டோ அதிகாரத்தின் மூலம் நிராகரித்தமை குறிப்பிடத்தக்கது.

இந்நிலையில் புதிய அரசியல் சட்டத்தை நிறைவேற்றுவது தொடர்பாக விரைவில் மக்களிடம் வாக்கெடுப்பு நடத்த ஜனாதிபதி பஷர் அல் அசாத் ஒப்புதல் அளித்துள்ளார். இந்த தகவலை சிரிய வெளியுறவு அமைச்சர் தெரிவித்துள்ளார். இந்த வாக்கெடுப்பு ஒரு வாரத்தில் அல்லது சற்று தாமதமாக நடைபெறலாம் என தெரிகிறது.