“ஊழல் முடிவுக்கு வராத நிலையில் அறைவதைத் தவிர வழியில்லை”

“ஊழல் முடிவுக்கு வராத நிலையில் அறைவதைத் தவிர வழியில்லை”
ராலேகான் சித்தி;
ஊழல் முடிவுக்கு, வராத நிலையில், பொறுமையிழக்கும்போது கன்னத்தில் அறைவதைத் தவிர வேறு வழியில்லை என, காந்தியவாதி அன்னா ஹசாரே தெரிவித்துள்ளார்.

ஊழலை ஒழிக்க போராடி வரும் அன்னா ஹசாரே, லோக்பால் சட்டமூலத்தை கொண்டு வரக்கோரி மூன்று முறை உண்ணாவிரதம் இருந்தார். தற்போது உடல் நிலை சரியில்லாததால், சொந்த கிராமமான ராலேகான் சித்தியில் ஓய்வெடுத்து வருகிறார். ஊழலை எதிர்க்கும் திரைப்படமான, ‘கலி கலி சோர் ஹாய்’ என்ற திரைப்படம் அவரது கிராமத்தில் நேற்று முன்தினம் திரையிடப்பட்டது.

இந்த படத்தை இயக்கிய, ரூமி ஜாப்ரி, நடிகர் அக்ஷய் கன்னா உள்ளிட்டோர் ஹசாரேவுடன் இந்தப் படத்தை நேற்று முன்தினம் பார்த்தனர். விவசாயத்துறை அமைச்சர் சரத் பவாரை, கடந்த ஆண்டு சீக்கிய வாலிபர் கன்னத்தில் அறைந்த போது, ஹசாரே அதை நியாயப்படுத்தினார். பின்னர் கண்டித்தார்.

நேற்று முன்தினம் திரைப்படம் முடிந்ததும் ஹசாரே குறிப்பிடுகையில், ‘ஊழல் ஒழியாத நிலை யில் பொறுமையிழக்கும் போது கன்னத்தில் அறைவதைத் தவிர வேறு வழியில்லை’ என்றார். இவரது இந்த பேச்சு, அரசியல் கட்சிகளிடையே கொந்தளிப்பை ஏற்படுத்தியுள்ளது.

காங்கிரஸ் கட்சியின் தகவல் தொடர்பாளர் ரேணுகா செளத்ரி குறிப்பிடுகையில், ‘அனுபவம் வாய்ந்த அன்னா ஹசாரே, வன்முறையை ஆதரித்துப் பேசுவது துரதிருஷ்டவசமானது. காந்தியக் கொள்கையில் வன்முறை ஆதரிக்கப்படவில்லை. கன்னத்தில் அறைவதை ஆதரிக்கும் ஹசாரே தன்னை காந்தியவாதி என கூறக்கூடாது’ என்றார்.