ஐ. நா. அணுசக்தி கண்காணிப்பு குழு ஈரான் பயணம்

by *சம்ஸ் Mon 30 Jan 2012 - 6:27

ஐ. நா. அணுசக்தி கண்காணிப்பு குழு ஈரான் பயணம்
ஈரானின் அணு சோதனை குறித்து ஐ. நா வின் சர்வதேச அணுசக்தி முகவர் நிலையத்தைச் சேர்ந்த (ஐ.ஏ.இ.ஏ) உயரதிகாரிகள் நேற்று ஈரான் சென்றடைந்தனர்.

அணு சோதனை மற்றும் அணு ஆயுதங்களை தயாரிப்பதாக ஈரான் மீது அமெரிக்கா மற்றும் மேற்குலக நாடுகள் குற்றம் சாட்டி வருகின்றன. மின்சார தேவைக்காகவே அணுசோதனை என ஈரான் கூறி வந்தாலும், தொடர்ந்து யுரேனியம் செறிவூட்டல் மையத்தினை அதிகரித்து வருவதாக புகார் எழுந்து வருகிறது. இதனை ஈரான் மறுத்து வருகிறது.

இந்த சூழ்நிலையில் ஐ.நா. வின் அமைப்பான சர்வதேச அணுசக்தி முகவர் நிலையத்தின் (ஐ.ஏ. இ.ஏ) துணை இயக்குனர் ஜெனரல் ஹெர்மான்நெக்ரட்ஸ் தலைமையிலான 6 பேர் கொண்ட குழுவினர் நேற்று ஈரான் சென்று அங்கு ஆய்வு நடத்தினர். அப்போது ஈரான் அணுவிஞ்ஞானிகள் மற்றும் உயரதிகாரிகளிடம் அணுசோதனை குறித்து கேள்வி எழுப்ப உள்ளனர்.

தொடர்ந்து மூன்று நாட்கள் ஈரானில் முகாமிட்டு இந்த சோதனை நடத்த உள்ளதாக தகவல்கள் தெரிவிக்கின்றன. இது குறித்து சர்வதேச அணுசக்தி முகவர் நிலைய தலைவர் யூகியோ அமோனா கூறுகையில், ஈரான் சென்றுள்ள குழுவினருக்கு அங்குள்ள அணுசக்தித்துறை அதிகாரிகள் உரிய பதில் அளிப்பர்.

இப்பிரச்சினைக்கு விரைவில் தீர்வு எட்டப்படும் என்றார். ஈரானின் அணுசோதனை குறித்து சர்வதேச அணுசக்தி குழு நடத்தும் இரண்டாவது சோதனை இதுவாகும். கடந்த 2008 ம் ஆண்டு முதன் முறையாக ஐ. ஏ. இ. ஏ. குழு ஈரான் சென்று அணுத்திட்டம் குறித்து ஆய்வு மேற்கொண்டது. தற்போது இரண்டாவது முறையாக ஈரான் சென்றுள்ளது.