லிபியாவில் புதிய தேர்தல் சட்டம்: பெண்கள் இட ஒதுக்கீடு நிராகரிப்பு

by *சம்ஸ் Tue 31 Jan 2012 - 6:27

லிபியாவில் புதிய தேர்தல் சட்டம்: பெண்கள் இட ஒதுக்கீடு நிராகரிப்பு
லிபியாவில் அரசியல் அமைப்பு சபையை அமைக்கும் வகையில் உருவாக்கப்பட்ட புதிய தேர்தல் சட்டத்தை, ஆளும் தேசிய இடைக்கால கவுன்சில் ஏற்றுக் கொண்டது.

அதே நேரம் அச்சட்டம் சபையில் பெண்களுக்கான இட ஒதுக்கீட்டை நிராகரித்துவிட்டது. லிபியாவில், அரசியல் அமைப்பை உருவாக்குவதற்காக, இந்தாண்டு ஜூன் மாதம், அரசியல் அமைப்பு சபை ஏற்படுத்தப்பட வேண்டும்.

அச்சபையை அமைப்பதற்கு வழி செய்யும் வகையில், புதிய தேர்தல் சட்டம் கொண்டு வரப்பட்டது. இச்சட்டம் ஏற்றுக் கொள்ளப்பட்டதாக பேஸ்புக் சமூக வலைத் தளத்தில், கவுன்சில் அறிக்கை வெளியிட்டது.

இச்சட்டத்தின்படி, பாராளுமன்றத்தின் மொத்தம் உள்ள 200 இடங்களில் 136 பேர் அனைத்துக் கட்சி உறுப்பினர்களும் 64 சுயேச்சைகளும், தேர்தல் மூலம் தேர்ந்தெடுக்கப்படுவர்.

ஆனால், இச்சபையில் ஒரு பெண் உறுப்பினர் கூட கிடையாது என்பது குறிப்பிடத்தக்கது. மொத்தம் உள்ள 200 இடங்களில், 10 சதவீதம் பெண்களுக்கு ஒதுக்கப்பட வேண்டும் என்ற பிரிவு இச்சட்டத்தில் இருந்தது. ஆனால், அதன் பின் கொண்டுவரப்பட்ட திருத்தத்தின்படி, அப்பிரிவு கைவிடப்பட்டது.