முஸ்லிம் இட ஒதுக்கீடு பற்றி பேச்சு: மந்திரி சல்மான் குர்ஷித் பிரசாரத்துக்கு தடை?

மத்திய சட்டம் மற்றும் நீதித்துறை மந்திரியாக இருக்கும் சல்மான் குர்ஷித் உத்தரபிரதேச சட்டசபை தேர்தல் பிரசாரத்தில் முஸ்லிம்கள் இட ஒதுக்கீடு பற்றி பேசியது பெரும் சர்ச்சையை ஏற்படுத்தியுள்ளது.சல்மான் குர்ஷித் தேர்தல் பிரசார பொதுக்கூட்டத்தில் பேசும்போது, முஸ்லிம் களுக்கு 9 சதவீத இடஒதுக்கீடு பெற்றுத் தருவேன் என்று வாக்குறுதி அளித்தார். இதற்கு தேர்தல் கமிஷன் எதிர்ப்பு தெரிவித்தது மத அடிப்படையில் பிரசாரம் செய்வது தேர்தல் நடத்தை விதியை மீறிய செயலாகும். எனவே தொடர்ந்து மத அடிப்படையில் பிரசாரம் செய்யக்கூடாது என்று அவருக்கு தேர்தல் கமிஷன் தடை விதித்தது.

ஆனால் அதை பொருட்படுத்தாமல் சல்மான் குர்ஷித் தனது மனைவி போட்டியிடும் பரூகாபாத் தொகுதியில் நடந்த பிரசார கூட்டத்தில் மீண்டும் அதே போல் பேசினார். தேர்தல் கமிஷன் என்னை தூக்கில் போட்டாலும் பரவாயில்லை, முஸ்லிம்களுக்கு இட ஒதுக்கீடு பெற்றுத்தருவேன். அதுபற்றி பேசியே தீருவேன். முஸ்லிம்களுக்கு கிடைக்க வேண்டியது கிடைக்கும் என்று சொல்லக் கூடாதா? நான் கொடுத்த வாக்குறுதியை காப்பாற்று வேன் என்று சல்மான் குர்ஷித் ஆவேசமாக பேசினார். அவரது பேச்சுக்கு பாரதீய ஜனதா உள்ளிட்ட எதிர்க்கட்சிகள் கடும் கண்டனம் தெரிவித்தன.

சட்டத்தை மதிக்க வேண்டிய மத்திய சட்ட மந்திரியே தேர்தல் கமிஷனுக்கு சவால் விட்டுப் பேசுகிறார். அவர் மீது தேர்தல் கமிஷன் கடும் நடவடிக்கை எடுக்க வேண்டும் என்று பாரதீய ஜனதா துணைத் தலைவர் முக்தர் அப்பாஸ் நக்வி கூறினார்.

சல்மான் குர்ஷித்தின் பேச்சால் தேர்தல் கமிஷனும் அதிர்ச்சி அடைந்தது. இதையடுத்து சல்மான் குர்ஷித் மீது ஜனாதிபதி பிரதீபாபட் டீலிடம் தேர்தல் கமிஷன் புகார் செய்துள்ளது. இது தொடர்பாக தலைமை தேர்தல் கமிஷனர் எம்.ஒய். குரேஷி ஜனாதிபதிக்கு அனுப்பியுள்ள கடிதத்தில், மத்திய சட்ட மந்திரியாக இருக்கும் ஒருவர் தேர்தல் கமிஷனை பலப்படுத்துவதற்கு பதில் பலவீனப்படுத்தும் வகையில் பேசி வருகிறார். அரசியல் சாசன சட்டத்தை மீறி அவரது கடமையை களங்கப்படுத்தும் விதமாக நடந்து கொள்கிறார். இது தேர்தல் கமிஷனை நிலைகுலையச் செய்வதாக உள்ளது. எனவே இதில் உடனடியாக தலையிட்டு அவர் மீது தீர்க்கமான நடவடிக்கை எடுக்க வேண்டும் என்று குறிப்பிட்டு இருந்தது.

அந்த கடிதத்தை ஜனாதி பதி பிரதீபா பட்டீல் உடனடியாக பிரதமர் அலுவலகத்துக்கு அனுப்பி உரிய நடவடிக்கை எடுக்கு மாறு கூறியுள்ளார். மத்திய மந்திரி ஒருவர் மீது ஜனாதிபதியிடம் தேர்தல் கமிஷன் புகார் செய்து இருப்பது வரலாற்றில் இதுவே முதல் முறையாகும்.

இது டெல்லி அரசியல் வட்டாரத்தில் பரபரப்பை ஏற்படுத்தியது. பிரதமர் மன்மோகன்சிங் இதுபற்றி மூத்த மந்திரிகள் மற்றும் காங்கிரஸ் மேலிடத்துடன் ஆலோசனை நடத்துகிறார். இதில் இப்போதைய நெருக்கடியை தீர்க்க சல்மான் குர்ஷித் மீது நடவடிக்கை எடுப்பது பற்றி விவாதிக்கப்படும்.

உத்தரபிரதேசத்தில் தேர்தல் பிரசாரம் செய்ய சல்மான் குர்ஷித்துக்கு தடை விதிக்கப்படுவது பற்றியும் ஆலோசிக்கப்படுகிறது. இது தொடர்பாக காங்கிரஸ் மேலிடத்தை பிரதமர் கேட்டுக் கொள்வார். அதன் பேரில் உத்தரபிரதேச தேர்தல் பிரசாரத்தில் இருந்து சல்மான் குர்ஷித்தை காங்கிரஸ் கட்சி வாபஸ் பெற்றுக் கொள்ளும் என்று தெரிகிறது. இது தொடர்பான முடிவு நாளை அதிகாரப் பூர்வமாக வெளியாகிறது.