தோட்டுப்பாய் மூத்தம்மா

by **பர்ஹாத் பாறூக்** Fri 23 Mar 2012 - 17:35

01. தோட்டுப்பாய் விரித்த மூத்தம்மா

தோட்டுப் பாய் விரித்தாள்
மூத்தம்மா...!
வெட்டும் கட்டும்
சூடடிப்புமாய் இருந்த வட்டைக்குள்
கதிர் பொறுக்கி
களவெட்டி அறுத்தும்
நெல்கூட்டி
கொண்டு வந்து
முடாப்பானைக் குள்ளிட்டு அவித்தாள்!

பதர், சுள்ளி கலவன் கட்டியெனப்
பிரித் தெடுத்து வீசினாள்!
நெல்மணிகள் சேர்த் தெடுத்து
துழாவிக் காய வைத்தாள்
கோழி காகமிவை
கொத்தாமல் பார்த்தாள்
கண்ணாடி வைத்தும்
ஒளிகாட்டி விரட்டினாள்!

பூண்போட்ட உலக்கை யினால்
நெல் குத்தி
கைக்குத் தரிசியிலே
இரவுணவைத் தயாரிக்க எண்ணினாள்!

கோழியொன்று எங்கிருந்தோ
குறுக்காலே பாய்ந்து வர
ஓடித் துரத் தினாள்
'நாசமாப்போ' என்றும்
நறுநறுத்தாள்!

மூச்சிரைக்கத் திரும்பி வந்து
உட்கார்ந்தாள் மரத் தடியில்!
அப்போதே
ஓங்காளம் வருவது போல்
உணர்ந்து 'ஓக்' என்றாள்
வாந்தி வர வில்லை..
சாய்ந்தாள் அம்மரத் தடியில்
சாய்ந்தாளே...!

'காலமாய்ப் போனாள் கிழவி' யெனக்
கதைத்தார் சில பேர்கள்
ஓலமிட் டழுதார்கள்
ஒருசில பேர்!
தானாய்த் தன் கை காலை
நம்பி வாழ்ந்த அவள்
போனாள் எனச் சிலபேர்
புலம்பி அழு தார்கள்!

பக்கத்துக் குடிசை பதறியது
பள்ளிக்கும் 'வியளம்'
சொல்லி அனுப் பியது!

அப்பொழுதே தொடங் கிற்று
அடக்;கும் கருமங்கள்!

கப்று வெட்ட வெனக்
கதைத்து முடிவெடுத்து
சென்றார் சிலர் சேர்ந்து
மண்வெட்டி வாளியோடு..
மஞ்சு கூட்ட வென
முன் னின்றார் சிலரங்கே!
சந்தூக்கைக் கொண்டு வரத்
துணை நின்றார் சில இளைஞர்!
கடல் நீரைக் கொண்டு வர
உடன் எழுந்தார் சில சிறுவர்!
குளிப்பாட்ட வென்றே
கூடிவந்தார் சில பெண்கள்

வெள்ளைப் புடவை, சுறுமா
பன்னீர் அத்தரென
எல்லாமே
ஒவ்வொன்றாய்ச் சேர்த் தெடுத்தார்
ஊரார்கள்!

புறப்பட்டு மையத்து
போயிற்று சந்தூக்கில்!

இத்தோடு

கடமை முடிந்த தெனக்
கலைந்து சிலர் சென்றார்கள்!

அமைதியாய்ப் போவதுதான்
ஆகுமெனச் சில பேர்கள்
மையத்தின் பின்னால்
மௌனமாய்ச் சென்றார்கள்
கலிமாவை மொழிவதுதான்
அழகென்று சில பேர்கள்
உரத்துக் கலிமாவை
ஓதியே சென்றார்கள்!

இதுவொன்றும் சொல்லாமல்
எதுவென்றும் கேளாமல்
அரசியலை ஊர்க் கதையை
அளந்தளந்து சில பேர்கள்
சிரித்துக் கதைத்த படி
பின்னாலே தொடர்ந் தார்கள்

புறப்பட்டு சந்தூக்கில்
போயிற்று மையத்து!

தோட்டுப்பாய்....!
மூத்தம்மா தொட்டளைந்த தோட்டுப்பாய்....
துவண்டு மடிந்து
கசங்கிப் போய்
சுருண்டு கிடந்த தங்கே
தேவையற்ற ஒன்றாகி!

01. தோட்டுப்பாய் - நெல் காயவைக்கப் பயன்படும் நீண்ட பாய்
02. கப்று – புதைகுழி
03. மஞ்சு – மையத்தை வைத்து மூடுவதற்காகப் பலகையால் செய்யப்படும் உபகரணம்
04. மையத்து – உயிரற்ற சடலம்
05. சந்தூக்கு - மையத்தை தூக்கிச் செல்ல பயன்படுத்தும் பாடை
06. சுறுமா – கண் இமைகளுக்கு தீட்டும் தூரிகை
07. கலிமா – உறுதி மொழி