புதிய அணித்தலைவரை தேட வேண்டும்: ஜெயவர்த்தன

by **நேசமுடன் ஹாசிம்** Wed 11 Apr 2012 - 7:23

இலங்கை அணிக்கு நிரந்தர அணித்தலைவர் ஒருவரை விரைவாக தேட வேண்டியுள்ளதாக இலங்கை அணியின் அணித்தலைவர் மஹேல ஜெயவர்த்தன தெரிவித்துள்ளார்.
திலகரத்ன டில்ஷான் தலைமையிலான இலங்கை அணி தொடர் தோல்விகளை சந்தித்ததையடுத்து அப்பதவியிலிருந்து அவர் விலக்கப்பட்டதும் ஏற்பட்ட இடைவெளிக்கு மஹேல ஜெயவர்தன அணித்தலைவராக நியமிக்கப்பட்டார்.

பதவியேற்கும் போதே 12 மாத காலத்திற்கு மட்டுமே தான் அணித்தலைவராகப் பதவியேற்பேன் என்று அவர் தெரிவித்திருந்தார்.

1 வருட காலத்திற்கு அணியை வழிநடத்திச் செல்லும் கடமை தனக்குத் தரப்பட்டுள்ளதாகத் தெரிவித்துள்ள மஹேல ஜெயவர்த்தன, இயலுமான விரைவில் இளம் வீரர் ஒருவரைத் தலைவராக வளர்த்து அவரிடம் விரைவாக அணித்தலைமைப் பொறுப்பைக் கையளிக்க விரும்புவதாக கூறியுள்ளார்.

அணியில் வீரர்களுக்கு தொடர்ச்சியான வாய்ப்புக்கள் வழங்கப்பட வேண்டும் வீரர்களுக்கு தேவையான வாய்ப்புக்கள் வழங்கப்பட்ட பின்னரே அவர்களைப் பற்றிய முடிவுகள் எடுக்கப்பட வேண்டும் எனத் தெரிவித்தார்.

ரங்கனா ஹெராத் திறமையாக பந்து வீசி வருகிறார் அவரைப் போலவே இன்னொரு வீரரும் உருவாக வேண்டும் என்றார்.

அணித்தலைமையில் தொடர்ந்தும் செயற்பட விரும்பவில்லை என்ற போதிலும், தனது சர்வதேசக் கிரிக்கெட் எதிர்காலம் தொடர்பாக எந்தவொரு முடிவையும் எடுக்க விரும்பவில்லை என்றும் தெரிவித்துள்ளார்.