ரகசியங்கள் கசிவது மற்றவர்களுக்கு சுவாரசியம்.

by **ஹனி** Mon 24 Jan 2011 - 20:29

ரகசியங்கள் கசிவது மற்றவர்களுக்கு சுவாரசியம். சம்பந்தப்பட்டவர்களுக்கு அப்படியல்ல. அவமானம், ஆபத்து என இழப்புகளை ஏற்படுத்தும். ஒட்டுக் கேட்பது என்பது ராஜாக்கள் காலத்தில் இருந்தே தொடர்கிறது. பக்கத்து வீட்டுக்காரரின் ஒட்டுக்கேட்கும் திறமையால் வீட்டு உறுப்பினர் ஒருவருக்கு தெரியாத விஷயம்கூட வீதியில் அலசப்படுவது உண்டு.

நவீன சாதனமான செல்போன் வந்தபிறகு ஒட்டுக் கேட்பது என்பது பூதாகரமான பிரச்சினையாக இருக்கிறது. இதில் பாதுகாப்பு ஒருபுறம் என்றால் அத்துமீறல்கள் அதன் அடுத்தபக்கம்.

***

இந்தியாவில் 10 லட்சத்திற்கு மேற்பட்டவர்களின் செல்போன் பேச்சுகளை மத்திய அரசு அமைப்புகள் கண்காணித்து வருகின்றன. அதாங்க, ஒட்டுக் கேட்டு வருகிறார்கள். இதில் டெல்லியில் இருக்கும் 6 ஆயிரம் பிரமுகர்களும் அடக்கம். அனைவரும் அதிகாரிகள், முக்கியப் புள்ளிகள், தீவிரவாதிகள் என சந்தேகிக்கப்படுபவர்கள், அவர்களின் ஆதரவாளர்கள், ஆயுத விற்பனையாளர்கள் ஆவர்.

ஒரு தொலைபேசி அழைப்பை ஒட்டுக்கேட்கவும், தேவைப்பட்டால் அதில் குறுக்கிடவும் உள்துறை அமைச்சகத்திற்கு உரிமை இருக்கிறது.

***

சட்ட அமலாக்க அமைப்புகள் ஒரு தொலைபேசியை முதல்வாரம் மட்டும் அனுமதி இல்லாமல்கூட ஒட்டுக்கேட்கலாம். வலுவான காரணம் இருந்தால் மட்டுமே தொடர்ந்து ஒட்டுக்கேட்க அனுமதி உண்டு. ஆனால் நிஜத்தில் அப்படி நடப்பதில்லை.

ஒவ்வொரு மாநிலத்திலும் சுமார் 3 ஆயிரம் போன்கள் கண்காணிக்கப்படுகின்றன. ஒட்டுக் கேட்பதை ஒருங்கிணைக்கும் அமைப்பு இல்லாததாலும், கருவிகள் எளிதாக கிடைப்பதாலும் மத்திய, மாநில அமைப்புகள் அதிகமாக ஒட்டுக்கேட்கின்றன.

***

இந்திய சட்டப்படி, பொது அவசர நிலை அல்லது மக்கள் பாதுகாப்பைக் கருத்தில் கொண்டு மட்டுமே ஒருவரது அழைப்பை ஒட்டுக்கேட்கலாம். இந்திய தந்திச் சட்டத்தின் 5-ம் பிரிவில் இது அனுமதிக்கப்படுகிறது. உள்துறை அமைச்சகம் மற்றும் 7 அரசு அமைப்புகளுக்கு ஒட்டுக்கேட்கும் உரிமை உள்ளது. அவர்கள் கேட்டால் செல்போன் நிறுவனங்கள் சம்பந்தப்பட்ட எண்ணை ஒட்டுக்கேட்க அனுமதிக்க வேண்டும். இந்த ஒட்டுக் கேட்ட ஒலிப்பதிவுகள் வழக்குகளில் முக்கிய ஆதாரங்களாக எடுத்துக் கொள்ளப்படுகின்றன. பாதுகாப்பை உறுதிப்படுத்துவதிலும் உதவுகின்றன.

by **ஹனி** Mon 24 Jan 2011 - 20:34

***

சிறப்பு மென்பொருளை பதிவு செய்து கொண்டால் சாதாரண கணினி மூலமாகவும் ஒட்டுக்கேட்க முடியும். ஆன்டனா, ஏற்பி போன்ற சிறப்பு கருவிகளும் இணைக்க வேண்டும். இதன் மூலம் 200 மீட்டர் சுற்றளவுக்குள் பேசப்படும் அழைப்புகளை கண்காணிக்கலாம். பதட்டமான பகுதிகள், கலவர பகுதிகளில் இதுபோன்ற கண்காணிப்புகள் செய்யப்படும். தேசிய தொழில்ட்ப ஆராய்ச்சி அமைப்பு (என்.டி.ஆர்.ஓ.), உளவுத்துறை, மாநில காவல்துறைகள் ஆகியோருக்கு சில வரம்புகளுடன் இதற்கான அனுமதி வழங்கப்பட்டிருக்கிறது.

***

தீவிரவாதிகள் மற்றும் முக்கிய பிரமுகர்கள் ஒட்டுக்கேட்பதில் இருந்து தப்பிக்க பல்வேறு வழிகளை கையாள்கிறார்கள். சிலர் சங்கேத பாஷையில் பரிமாறிக் கொள்கிறார்கள். சிலர் பிளாக்பெரி, இன்மார்சாட்- 4 போன்ற அயல்நாட்டு தொழில்ட்ப செல்போன்களை பயன்படுத்துகிறார்கள்.

இப்படி குறுக்குவழியில் செயல்படுபவர்களை கண்காணிக்க முடியாமல் உளவு அமைப்புகள் திணறும். அந்த நேரத்தில் சம்பந்தப்பட்டவர்களின் உரையாடலை ஒட்டுக்கேட்கவும், குறியீடு மாற்றம் செய்து வழங்கவும் அமெரிக்கா, இங்கிலாந்து போன்ற வெளிநாடுகளிடமும் இந்தியா பேச்சுவார்த்தை நடத்தும்.

***

செல்போன் நிறுவனங்களுக்குத் தெரியாமலும் நம் பேச்சுகள் ஒட்டுக் கேட்கப்படலாம். சட்ட அமலாக்க அமைப்புகளுக்கு இப்படி நேரடியாக குறுக்கிடும் உரிமை இருக்கிறது. உங்களுக்கு போலியாக ஒரு அழைப்பு (பிங்கிங் என பெயர்) கொடுத்து உங்கள் செல்போனில் ரகசியமாக ஒரு மென்பொருளை இன்ஸ்டால் செய்து விடுவார்கள். பிறகு உங்கள் ரகசியங்கள் எல்லாம் பதிவு செய்யப்பட்டுவிடும். போனை `சுவிட்ச் ஆப்’ செய்து வைத்திருந்தால்கூட குறிப்பிட்ட தொலைவிற்குள் பேசப்படும் பேச்சுகளை இந்த முறையில் பதிவு செய்ய முடியும்.