மயிலாடுதுறையில் பெண் கொலை: காதுடன் தோடை அறுத்துக்கொண்டு கொள்ளையன் ஓட்டம்

நாகை மாவட்டம் மயிலாடுதுறை கூரைநாடு பெரியசாலிய தெருவை சேர்ந்தவர் அருணாசலம் நிலக்கிழார். இவரது மனைவி வத்சலா (வயது 60). இவர்களது வீடு அரண்மனைபோல் பெரியதாக இருக்கும். இன்று அதிகாலை 4.45 மணியளவில் வத்சலா எழுந்தார். வீட்டு வாசலில் தண்ணீர் தெளித்து கோலம் போட்டுக்கொண்டிருந்தார்.

அப்போது கொள்ளையர்கள் 2 பேர் அங்கு வந்தனர். ஒருவன் வத்சலா வீட்டின் கேட் அருகே நின்று கொண்டான். மற்றொருவன் காம்பவுண்டு சுவர் ஏறி குதித்து உள்ளே வந்தான். அப்போது வத்சலா குனிந்து கோலம் போட்டுக் கொண்டிருந்ததால் அதனை கவனிக்கவில்லை. உள்ளே வந்த கொள்ளையன் வத்சலா கழுத்தில் கிடந்த 10 பவுன் நகையை பறிக்க முயன்றான். இதனை அவர் தடுத்தார்.

மேலும் அவர் சத்தம் போட்டார். இதனால் கொள்ளையன் ஆத்திரம் அடைந்தான். அவன் கையில் வைத்திருந்த கத்தியால் வத்சலாவை சரமாரியாக குத்தினான். இதில் அவர் சம்பவ இடத்திலேயே ரத்த வெள்ளத்தில் பிணமானார். அதன்பின் கொள்ளையன் நிழக்கிழார் மனைவி வத்சலா கழுத்தில் அணிந்திருந்த 10 பவுன் நகையை பறித்தான். அவர் காதில் கிடந்த வைர தோடை பறிக்க முயன்றான்.

ஆனால் முடியவில்லை. சுவர் ஏறி குதித்து வெளியே நின்றவனுடன் தப்பி ஓடிவிட்டான். இன்று காலை வத்சலாவின் உறவினர் அங்கு வந்தார். அவர் வத்சலா கொலை செய்யப்பட்டு நகைகள் கொள்ளை போய் இருந்ததை கண்டு திடுக்கிட்டார். இதுகுறித்து அவர் மயிலாடுதுறை போலீசுக்கு தகவல் தெரிவித்தார்.

தகவல் கிடைத்ததும் நாகை மாவட்ட போலீஸ் சூப்பிரண்டு ராமர் மயிலாடுதுறை டி.எஸ்.பி. அப்துல்அஜிஸ் ஆகியோர் அங்கு விரைந்து வந்தனர். போலீஸ் மோப்ப நாய் வரவழைக்கப்பட்டது. அது கொலை நடந்த இடத்தை மோப்பம் பிடித்து விட்டு சிறிது தூரம் ஓடியது, கைரேகை நிபுணர்களும் வந்து கொள்ளையனின் ரேகையை பதிவு செய்தனர்.

கொலை செய்யப்பட்ட வத்சலாவின் உடல் பிரேத பரிசோதனைக்காக மயிலாடுதுறை அரசு ஆஸ்பத்திரிக்கு அனுப்பி வைக்கப்பட்டது. கொலை கொள்ளை குறித்து மயிலாடுதுறை போலீஸ் இன்ஸ்பெக்டர் (பொறுப்பு) நாகராசன், சப் இன்ஸ்பெக்டர்கள் தாமரைச் செல்வன், சின்னத்துரை. மகாலட்சுமி, சிறப்பு சப் இன்ஸ்பெக்டர் திரவியம் ஆகியோர் வழக்குபதிவு செய்தனர்.

கொலையாளிகளை பிடிக்க மாவட்ட போலீஸ் சூப்பிரண்டு ராமர் உத்தரவின் பேரில் தனிப்படை அமைக்கப்பட்டு உள்ளது. அவர்கள் கொலையாளியை தேடி வருகின்றனர். கொலை செய்யப்பட்ட வத்சலாவிற்கு ரம்யா என்ற மகள் உள்ளார். அவருக்கு திருமணமாகி விட்டது. அவர் கணவருடன் வசித்து வருகிறார்.

மயிலாடுதுறையில் ரோட்டில் நடந்து செல்லும் பெண்களிடம் இரு சக்கர வாகனத்தில் வந்து நகையை பறித்து செல்லும் சம்பவம் அடிக்கடி நடைபெற்று வந்தது. இந்த நிலையில் பெண்ணை கொன்று நகையை பறித்த சம்பவம் பெரும் பரபரப்பை ஏற்படுத்தி உள்ளது. இதனால் பெண்கள் பீதியில் உள்ளனர்.