பலாலி ஆசிரியர் பயிற்சிக் கல்லூரி தனியாக இயங்க அமைச்சர் டக்ளஸ் நடவடிக்கை

May 18th, 2012 அன்று பிரசுரிக்கப்பட்டது.

யாழ்.பலாலி ஆசிரியர் பயிற்சிக் கலாசாலையை கோப்பாய் ஆசிரியர் பயிற்சிக் கலாசாலையுடன் இணைப்பது தொடர்பில் அண்மையில் எழுந்துள்ள பிரச்சினைக்கு ஈழ மக்கள் ஜனநாயகக் கட்சியின் செயலாளர் நாயகமும் பாரம்பரிய கைத்தொழில்கள் மற்றும் சிறுதொழில் முயற்சி அபிவிருத்தி அமைச்சருமான டக்ளஸ் தேவானந்தா தீர்வினைப் பெற்றுக்கொடுத்துள்ளதாக அமைச்சின் ஊடகப்பிரிவு தெரிவித்துள்ளது.

இது தொடர்பாக அமைச்சின் ஊடகப்பிரிவு வெளியிட்டுள்ள அறிக்கை வருமாறு,

பழைமை வாய்ந்ததும் முன்னணி ஆசிரியர் பயிற்சிக் கலாசாலையுமான பலாலி ஆசிரியர் பயிற்சிக் கல்லூரியானது கடந்த காலயுத்த அழிவு காரணமாக உயர் பாதுகாப்பு வலயத்தினுள் அமைந்திருந்ததனால், அதன் செயற்பாடுகள் திருநெல்வேலி, முத்துத்தம்பி பாடசாலையில் குறுகிய இடத்தில் குறைபாடுகளுடன் மேற்கொள்ளப்பட்டு வந்த நிலையில் இதனைக் கோப்பாய் ஆசிரியர் பயிற்சிக் கலாசாலையுடன் இணைப்பது தொடர்பிலான கருத்துக்கள் அண்மைய காலமாக நிலவி வந்தன.

பலாலி ஆசிரியர் பயிற்சிக் கல்லூரியை அதி உயர்பாதுகாப்பு வலயத்திற்கு அப்பால் முழுமையான வசதிகளைக் கொண்ட உயர்கல்விப் பயிற்சி நிறுவனமாக உருவாக்குவதற்கு அமைச்சர் டக்ளஸ் தேவானந்தா, வடக்கு மாகாண ஆளுநர் மேஜர் ஜெனரல் ஜீ.ஏ சந்திரசிறியுடன் இணைந்து தீர்மானித்திருந்த நிலையிலேயே இக்கல்லூரியை கோப்பாய் ஆசிரியர் பயிற்சிக் கல்லூரியுடன் இணைக்கும் கருத்துக்கள் நிலவத் தொடங்கின.

இவ்விடயம் தொடர்பில் உடனடி நடவடிக்கைகளை மேற்கொண்டுள்ள அமைச்சர் டக்ளஸ் தேவானந்தா, பலாலி ஆசிரியர் பயிற்சிக் கலாசாலையை உரிய ஆசிரியர்களைக் கொண்டு தனியாக இயங்குவதற்குரிய நடவடிக்கைகளை மேற்கொண்டுள்ளதுடன் கற்பித்தல் உபகரணங்கள் மற்றும் ஏனைய அடிப்படை வசதிகளையும் அமைச்சர் வழங்க ஏற்பாடு செய்துள்ளார்.