உடுமலை அருகே ஆற்றில் விஷம் கலப்பு : மணல் கடத்தலை எதிர்த்ததால் சதியா?

May 18th, 2012 அன்று பிரசுரிக்கப்பட்டது.

உடுமலையில் வசிக்கும் ஒரு பகுதி மக்களின் குடிநீர் ஆதாரமான கூட்டாற்றில் விஷம் கலந்ததால் தண்ணீர் நிறம் மாறியதால், பொதுமக்கள் பீதியடைந்தனர்.

திருப்பூர் மாவட்டம், உடுமலை அருகேயுள்ள தேவனூர்புதூர், ராவணாபுரம், செல்லப்பம்பாளையம், அர்த்தநாரிபாளையம், எஸ்.நல்லூர் ஊராட்சிகளுக்கு, பாலாறு, நல்லாறு சேரும் கூட்டாற்றில், ஆறு வட்டக்கிணறு அமைத்து குடிநீர் வினியோகிக்கப்படுகிறது.

குடிநீரில் துர்நாற்றம் :

நேற்றுமுன்தினம் வினியோகிக்கப்பட்ட குடிநீரில் துர்நாற்றம் வீசியது. குடிநீரை பயன்படுத்திய சிலருக்கு உடல் எரிச்சல், வாந்தி ஏற்பட்டதாக கூறப்படுகிறது. இதனால் அச்சமடைந்த மக்கள், ஊராட்சி நிர்வாகத்திடம் தெரிவித்தனர்.

நள்ளிரவில் ஊராட்சி தலைவர்கள், ஒன்றியக்குழுத் தலைவர் ராஜலட்சுமி மற்றும் பொதுமக்கள், சம்பவ இடத்துக்கு சென்ற பார்த்தபோது, பாலாறு, நல்லாறு சேரும் கூட்டாற்று தண்ணீர், நீலம் மற்றும் பச்சை நிறத்தில் காணப்பட்டது.

விஷம் கலப்பா? :

தண்ணீர் செல்லும் பகுதியில், ஏதோ மருந்து பவுடர் கொட்டப்பட்டது தெரிய வந்தது. ஆற்று தண்ணீரில் விஷம் கலந்திருப்பதாக தகவல் பரவியதால், மக்கள் பீதியடைந்தனர்.

எம்.எல்.ஏ., ஆய்வு :

எரிசனம்பட்டி வட்டார அரசு ஆரம்ப சுகாதார நிலைய மருத்துவர் ராஜ்குமார் கூறுகையில், ” துத்தநாகம் கலந்த வேதிப்பொருட்கள், தண்ணீரில் கலந்திருக்கிறது.

மாசடைந்த நீர் அகற்றப்பட்டு, “குளோரினேட்’ செய்து, புதிய தண்ணீர் வழங்கப்படும்’ என்றார். மாசடைந்த குடிநீரின், மாதிரி எடுத்து, பரிசோதனைக்காக கோவைக்கு அனுப்பப்பட்டுள்ளது. மாசடைந்த நீர், மற்ற பகுதிகளில் கலக்காமல் தடுக்க, சிறிய தடுப்பணை அமைத்து, வெளியேற்றப்பட்டு வருகிறது.

திட்டமிட்ட சதியா? :

தேவனூர்புதூர், ராவணாபுரம் பகுதிகளில் மணல் கடத்தல் அதிக அளவு நடந்து வருகிறது. இதற்கு, இப்பகுதி மக்கள் எதிர்ப்பு தெரிவித்ததால், தண்ணீரில் மர்ம நபர்கள் விஷம் கலந்திருக்கலாம் என்ற சந்தேகம் எழுந்துள்ளது.

“தண்ணீரில் மாசு ஏற்படுத்தியவர்கள் மீது நடவடிக்கை எடுக்க கோரி, ஊராட்சித் தலைவர் அளித்த புகாரின் பேரில், தளி போலீஸ் ஸ்டேஷனில் வழக்குப்பதிவு செய்யப்படும்,’ என டி.எஸ்.பி., செந்தில் தெரிவித்தார். இச்சம்பவத்தால், அப்பகுதியில் பரபரப்பு ஏற்பட்டது.