பங்குச்சந்தையில் ஊழியர் சேமலாப நிதியப் பணம் முதலீடு செய்யப்பட்டமை குறித்து முறையிடப்படும்

செவ்வாய்க்கிழமை, 29 மே 2012 05:00 0 COMMENTS
(ஒலிந்தி ஜயசுந்தர)

4 பில்லியன் ரூபா வரையில் நட்டத்தை ஏற்படுத்திய ஊழியர் சேமலாப நிதியின் பங்குச்சந்தை முதலீட்டைப்பற்றி அனைத்து கம்பனி ஊழியர் சங்கம் இலஞ்ச மற்றும் ஊழல் ஆணைக்குழுவிடம் ஒரு முறைப்பாட்டை தாக்கல் செய்ய உள்ளது.

இந்த விடயம் தொடர்பில் அரசாங்கம் நடவடிக்கை எடுக்கத் தவறிவிட்டது. இதனால் இந்த மாதிரியான முதலீட்டுக்கான காரணங்களை அறிய ஏனையோர் தலையிட வேண்டிய அவசியம் ஏற்பட்டுள்ளது. குற்றவாளிகள் இனங்காணப்பட்டு தண்டனை வழங்கப்படுவதை உறுதி செய்யவும் இது தேவையாக உள்ளது என சங்கத்தின் தலைவர் வசந்த சமரசிங்க கூறினார்.

தனியார் துறையில் உள்ள ஊழியர்களின் பணத்தை முதலீடு செய்யும் ஊழியர் சேமலாப நிதியத்தின் நடவடிக்கைகளில் ஊழல்கள் காணப்படுகின்றன. இதேபோக்கு தொடருமாயின் தனியார் துறை ஊழியர்கள் வட்டியை மட்டுமன்றி முதலீட்டின் கணிசமான பகுதியையும் இழக்க நேரிடும் அவர் கூறினார்.

ஊழியர் சேமலாப நிதியம் பங்குச்சந்தையில் 7.2 பில்லியன் ரூபாவை முதலீடு செய்துள்ளது. ஊழியர் சேமலாப நிதியம் 2010இல் 32.5 ரூபா விலையில் வாங்கிய கலதாரி ஹோட்டலின் பங்குகளின் விலை தற்போது 17 ரூபாவாக வீழ்;ச்சி கண்டுள்ளது. கடந்த 6 மாதங்களில் மட்டும் ஊழியர் சேமலாப நிதியம் 1.3 பில்லியன் ரூபாவை பங்குச்சந்தை முதலீடுகள் மூலம் இழந்துள்ளது.

ஊழியர் சேமலாப நிதியில் உள்ள பணம் அரசாங்கத்தின் பணம் அல்ல. அது மக்களின் பணம். சட்ட விதிகளை அனுசரிக்காமல் வெளிப்படைத் தன்மை இல்லாமல் அதை நிர்வகிப்பவர்கள் யாரும் இதைப் பயன்படுத்த முடியாது என சமரசிங்க கூறினார்.

ஊழியர் சேமலாப நிதியத்தில் 2011 அறிக்கை இன்னும் வெளியாகவில்லை. இது விரைவில் வெளியிடப்படாவிட்டால் சங்கங்கள் கடுமையான தொழிற்சங்க நடவடிக்கை எடுக்கும் என அவர் கூறினார்.