பணம் கோரி தந்தையை மிரட்டிய நடிகைக்கு அபராதம்

செவ்வாய்க்கிழமை, 29 மே 2012 03:30 0 COMMENTS
(லக்மால் சூரியகொட)

தனது தந்தையை மிரட்டி ஒரு லட்சம் ரூபாவை பெற முயன்றதாக குற்றம்சுமத்தப்பட்ட தொலைக்காட்சி நாடக நடிகையான அனுஷ்கா சொனாலி சயக்கார, தன் மீதான குற்றச்சாட்டை நீதிமன்றில் ஒப்புக்கொண்டார்.

அதையடுத்து இவ்வழக்கில் அரசுக்கான செலவுத் தொகையாக 1000 ரூபாவை அபராதமாக செலுத்துமாறு நடிகைக்கு நீதிமன்றம் உத்தரவிட்டது.

நீதவான் கனிஷ்க விஜேரட்ன முன்னிலையில் இவ்வழக்கு நேற்று விசாரணைக்கு எடுத்துக்கொள்ளப்பட்டது.

நடிகையின் சார்பில் ஆஜரான வழக்குரைஞர், இப்பிரதிவாதி இனிமேல் தனது தந்தைக்கு தொந்தரவு ஏற்படுத்த மாட்டார் எனவும் அவருக்கு தாட்சணியமான குறைந்தபட்ச தண்டனை வழங்குமாறும் நீதிபதியிடம் கோரினார். தனது கட்சிக்காரர் அவரின் தந்தையின் வீட்டிற்கு செல்ல மாட்டார் எனவும் வழக்குரைஞர் கூறினார்.

நடிகை அனுஷ்காவின் தந்தை இதற்கு ஆட்சேபம் தெரிவிக்காதபடியால், அரசுக்கு செலவுத் தொகையாக 1000 ரூபாவை செலுத்துமாறு அனுஷ்காவுக்கு நீதிபதி உத்தரவிட்டார்.

நடிகை அனுஷ்கா தன்னிடமிருந்து ஒரு லட்சம் ரூபாவை மிரட்டிப் பெற்றார் எனவம் அதற்கு மேலாக இன்னும் ஒரு லட்சம் தர வேண்டும் என மிரட்டினார் எனவும் அவரின் தந்தை கொம்பனித் தெரு பொலிஸில் முறைப்பாடு செய்திருந்தார். பல்வேறு தடவைகளில் நான்கு லட்சத்திற்கு மேற்பட்ட தொகையை தனது மகளுக்கு தான் கொடுத்திருந்ததாகவும் அவர் கூறியிருந்தார்.