பள்ளிவாசல்களின் விபரங்களைத் திரட்டும் குற்றப்புலனாய்வுப் பிரிவு! அதிர்ச்சியில் உறையும் முஸ்லிம்கள்!!

June 2nd, 2012 அன்று பிரசுரிக்கப்பட்டது.


முஸ்லிம் மத விவகார திணைக்களத்துக்கு நேற்று நேரில் சென்ற குற்றப்புலனாய்வுத் திணைக்கள அதிகாரி ஒருவர் அனைத்து முஸ்லிம் பள்ளிவாசல்கள் மற்றும் மதரசாக்களின் விபரங்களைச் சமர்ப்பிக்குமாறு கேட்டுள்ளார்.

அதற்கு முஸ்லிம் மத விவகாரத் திணைக்கள அதிகாரிகள் எழுத்து மூலமாக கோரினாலேயே, இந்த விபரங்களை ஒப்படைக்க முடியும் என்று தெரிவித்துள்ளனர்.

முஸ்லிம் பள்ளிவாசல்கள் மற்றும் மதரசாக்களின் விபரங்களை குற்றப்புலனாய்வுப் பிரிவு கோரியுள்ளமை தொடர்பில், முஸ்லிம் அரசியல்வாதிகள் மத்தியில் கடும் சீற்றத்தை ஏற்படுத்தியுள்ளது.

இதுகுறித்து விசனம் வெளியிட்டுள்ள முஸ்லிம் காங்கிரஸ் நாடாளுமன்ற உறுப்பினர், ஹசன் அலி, இந்த விவகாரத்தை தமது கட்சியின் தலைவரான அமைச்சர் ரவூப் ஹக்கீம், ஜனாதிபதியின் கவனத்துக்கு எடுத்துச் செல்வார் என்று தெரிவித்துள்ளார்.

இது வரவேற்கத்தக்கது அல்ல, அவரகள் எதற்கு முஸ்லிம்களை கிள்ளுகிறார்கள் என்று தெரியவில்லை என்றும் அவர் மேலும் குறிப்பிட்டுள்ளார். அதேவேளை இந்த விபரங்களை திரட்ட வேண்டிய வேலை குற்றப்புலனாய்வுப் பிரிவுக்கு இல்லை என்று மூத்தஅமைச்சர் ஏ.எச்.எம்.பௌசியும் தெரிவித்துள்ளார்.

தம்புள்ள பள்ளிவாசலையும், தெகிவளை மதரசாவையும் அகற்றக் கோரி அண்மையில் பௌத்த பிக்குகள் போராட்டங்களை நடத்திய பின்னணியில், குற்றப்புலனாய்வுப் பிரிவின் இந்த நடவடிக்கை முஸ்லிம்களை அச்சமடைய வைத்துள்ளது