சட்டவிரோதக் கருக்கலைப்பு! அதிக இரத்தப் போக்கால் தாய் மரணம்!! எங்கே போகிறது யாழ்?

June 5th, 2012 அன்று பிரசுரிக்கப்பட்டது.


யாழ். சுன்னாகம் பிரதேசத்தில் முறையற்ற விதத்தில் கர்ப்பம் தரித்த தாயொருவர், சட்டவிரோதக் கருக்கலைப்பினால் அதிக இரத்தப் போக்கு ஏற்பட்டு மரணமானார். அவரது 9 மாதச் சிசு அருகிலுள்ள காணியில் புதைக்கப்பட்ட நிலையில் மீட்கப்பட்டுள்ளது.

நேற்றுக்காலை இடம்பெற்ற இந்தச் சம்பவம் தொடர்பில் மேலும் தெரியவருவதாவது

சுன்னாகத்தைச் சேர்ந்த தாயொருவர் (வயது47) முறையற்ற விதத்தில் கர்ப்பமாகியுள்ளார். குறித்த தாயின் கணவர் வெளிநாட்டில் உள்ள நிலையில் அவர் வேறொருவர் மூலம் கர்ப்பமாகியதாகத் தெரிவிக்கப்பட்டது.

வயிற்றில் கட்டி ஏற்பட்டுள்ளதாக சொல்லி கடந்த மாதம் 21ஆம் திகதி யாழ். போதனா வைத்தியசாலைக்கு அவர் சிகிச்சைக்குச் சென்றுள்ளார். இதன்போது அவரது வயிற்றில் சிசு உருவாகியமை பரிசோதனைகள் மூலம் அறியப்பட்டது.

இதனையடுத்து குறித்த தாய்க்கு இந்த மாதம் இறுதிப் பகுதியில் குழந்தை பிறக்கும் என்பதால் அவரை எதிர்வரும் 8ம் திகதி வைத்தியசாலை விடுதிக்கு வருமாறு வைத்தியர்கள் அறிவுறுத்தியுள்ளனர்.

இந்த நிலையில் குறித்த தாய் நேற்றுக்காலை தனது வீட்டில் வைத்தே குழந்தையை கருக்கலைப்புச் செய்ய முயன்று பிரசவித்துள்ளார். ஒன்பது மாதக் குழந்தை இறந்து பிறந்ததாகத் தெரிவிக்கப்படுகின்றது.

அத்துடன் கருக்கலைப்புச் செய்தவர் ஒழுங்கான முறையில் நஞ்சுக் கொடியை அகற்றாததால் தொடர் குருதிப் போக்கு ஏற்பட்டு தாயார் சோர்வடைந்த நிலையில் வைத்தியசாலைக்குக் கொண்டுவரப்பட்டார்.

அதேவேளை பிறந்த குழந்தை அயலில் வளவு ஒன்றில் புதைக்கப்பட்டதாக கூறப்படுகின்றது. தாயார் வைத்தியசாலைக்கு கொண்டுவரும் வழியில் இறந்துள்ளார். புதைக்கப்பட்ட குழந்தையின் சடலம் கோப்பாய் பொலிஸாரால் மீட்கப்பட்டுள்ளது.

இது தொடர்பான மேலதிக விசாரணைகளை பொலிஸார் மேற்கொண்டுள்ளனர்.