மஹிந்தரை வரவேற்க பிரித்தானிய அரசின் இளநிலை அதிகாரிகள் கூட விமான நிலையத்தில் இல்லை!!

June 5th, 2012 அன்று பிரசுரிக்கப்பட்டது.


நான்கு நாள் பயணமாக லண்டன் சென்றுள்ள சிறிலங்கா அதிபரை ஹீத்ரோ விமான நிலையத்தில் வரவேற்க பிரித்தானிய அரசின் பிரதிநிதிகள் எவரும் செல்லவில்லை என்று தெரியவந்துள்ளது.

நேற்று லண்டனைச் சென்றடைந்த மகிந்த ராஜபக்சவுக்கு அங்குள்ள சிறிலங்கா தூதுவர் கிறிஸ் நொனிஸ் மற்றும் தூதரக அதிகாரிகள் மட்டுமே வரவேற்பு அளித்தனர்.

பிரித்தானிய அரசின் இளநிலை அதிகாரிகள் கூட வரவேற்பில் பங்கேற்கவில்லை.

சிறிலங்கா தூதரக ஏற்பாட்டில் இரு சிறுவர்கள் மகிந்த ராஜபக்சவையும் சிராந்தி ராஜபக்சவையும் மாலை அணிவித்தும் பூச்செண்டு கொடுத்தும் வரவேற்றனர்.

பிரித்தானிய அரசின் அழைப்பின் பேரில் இந்த பயணம் இடம்பெற்றதாக சிறிலங்கா அரசாங்கம் கூறியுள்ளது.

அவ்வாறு பிரித்தானிய அரசு அழைப்பு விடுத்திருந்தால், மகிந்த ராஜபக்சவுக்கு பிரித்தானிய அரசின் சார்பில் விமான நிலையத்தில் வரவேற்பு அளிக்கப்பட்டிருக்கும் என்பது குறிப்பிடத்தக்கது.

அதேவேளை கொமன்வெல்த் செயலர் கமலேஸ் சர்மா மகாராணிக்கு அளிக்கும் விருந்தில் பங்கேற்கவே மகிந்த ராஜபக்ச அழைக்கப்பட்டிருந்தார்.

இந்த ஒரேஒரு அரசகுடும்ப நிகழ்விலேயே அவர் பங்கேற்பார் என்றும் பிரித்தானிய அதிகாரிகள் தகவல் வெளியிட்டிருந்தனர்.

ஆனால் நேற்று சிறிலங்கா அதிபர் செயலகம் வெளியிட்டுள்ள அறிக்கை ஒன்றில், மகாராணிக்கு பக்கிங்ஹாம் அரண்மனையில் அளிக்கப்படும் வரவேற்பிலும், சென்.போல் தேவாலயத்தில் நடைபெறும் ஆராதனையிலும், கொமன்வெல்த் செயலர் அளிக்கும் விருந்திலும் மகிந்த ராஜபக்ச பங்கேற்பார் என்று கூறப்பட்டுள்ளது.

இதற்கிடையே, லண்டனில் இருந்து வத்திக்கானுக்கு சிறிலங்கா அதிபர் மகிந்த ராஜபக்ச மேற்கொள்ளும் பயணமும் தனிப்பட்ட பயணமே என்றும் அறிவிக்கப்பட்டுள்ளது.

இதன்போது பபல் நூலகத்தில் பாப்பரசர் 16வது பெனடிக்ட்டை மகிந்த ராஜபக்ச சந்திக்கவுள்ளார்.