ஒலிம்பிக் தொடக்கவிழா நிகழ்வில் இலங்கை தமிழ் பெண் மியாவின் இசையா?

லண்டன் ஒலிம்பிக்ஸ் தொடக்கவிழா நிகழ்வில் இலங்கை தமிழரான மியா என்றழைக்கப்படும் மாதங்கி அருள்பிரகாசம் அவர்களின் பாடல் ஒன்று இடம் பெற இருப்பதாக பிரித்தானிய நாளிதழ்கள் தகவல் தெரிவித்துள்ளன.

2012ம் ஆண்டிற்கான ஒலிம்பிக் போட்டி இந்த வருடம் லண்டனில் நடைபெற உள்ளது.

இந்த ஒலிம்பிக் விளையாட்டுப் போட்டிகளின் தொடக்க விழாவில் பல்வேறு கலை கலாசார நிகழ்ச்சிகள் நடைபெறும். இதில் தெரிவுசெய்யப்பட்ட உலகப் பாடல்கள் அடங்கிய ஒரு நிகழ்ச்சியும் உண்டு.

இந்நிகழ்ச்சியில் இடம் பெறும் 86 பாடல்களில் தமிழ்த் திரைப்படப் பாடலும் ஒன்று என்று பிரித்தானிய நாளிதழ்கள் சில தகவல்கள் வெளியிட்டுள்ளன.

பெரும்பாலும் பிரிட்டிஷ் இசைக் கலைஞர்களின் பாடல்களே இடம்பெறும் இந்தப் பட்டியலில் இடம்பிடித்துள்ள வேற்று மொழி பாடல்களில் ஒன்று இலங்கையைப் பூர்விகமாகக் கொண்ட பிரிட்டனில் வாழும் தமிழ்க் கலைஞர் மியா என்ற மாதங்கி அருள்பிரகாசம் அவர்களின் பிரபலமான “பேப்பர் ப்ளேன்ஸ்” (காகித விமானங்கள்) என்ற பாடல் இந்தப் பட்டியலில் இடம்பெறுவதாக செய்திகள் கூறுகின்றன.

குடியேறிகளின் அனுபவத்தைச் சொல்லும் இந்தப் பாடல், 2007ம் ஆண்டு இயற்றப்பட்ட அவரது இரண்டாவது ஆல்பமான “கலா” என்ற ஆல்பத்தில் இடம்பெற்றிருந்தது.

இந்த தகவல் குறித்து ஒலிம்பிக் ஏற்பாட்டுக்குழுவினர் அதிகாரபூர்வமாகக் கருத்து எதையும் தெரிவிக்க மறுத்துவிட்டனர்.

உலக அளவில் பல லட்சக்கணக்கானோர் பார்த்து ரசிக்க இருக்கும் ஒலிம்பிக் தொடக்கவிழாவில் எமது தமிழ் பெண்ணின் இசையும் இடம்பெறப்போகிறது என்பது தமிழ் ரசிகர்களுக்கு மகிழ்ச்சியான விடயமாகும்.